Néstor Rego, parlamentario do BNG no Congreso dos Deputados, visitou Tomiño para interesarse polo proxecto da biblioteca municipal
O goberno local aproveitou a súa visita para amosarlle diversos proxectos de gran importancia estratéxica para o municipio
Infogauda / Tomiño
O deputado do BNG no Congreso dos Deputados, Néstor Rego Candamil, realizou o pasado mércores día 9 deste mes, unha visita institucional ao Concello de Tomiño para interesarse polo proxecto da biblioteca municipal, un dos proxectos máis importantes na axenda do goberno local. O deputado nacionalista xa solicitou o apoio do Ministerio de Fomento para axudar a financiar a súa construción a través dunha das enmendas presentadas na negociación dos Orzamentos Xerais do Estado que tivo lugar recentemente.
Rego foi recibido pola alcaldesa, Sandra González Álvarez, acompañada tamén por boa parte dos concelleiros do goberno local, que lle ensinaron o lugar escollido para a instalación da futura biblioteca, ademais de mostrarlle as instalacións da Casa do Concello, a praza do Seixo e o Mercado de Tomiño.
A alcaldesa trasladou ao parlamentario do BNG a necesidade de contar co apoio económico das demais administracións públicas para poder executar a obra, especialmente co do Ministerio de Fomento, que xa tiña comprometida unha partida orzamentaria para a realización do proxecto durante o goberno de José Luis Rodríguez Zapatero, pero que foi suspendida trala súa saída do executivo. A rexidora destacou tamén o feito de que a recuperación de dita partida foi aprobada por unanimidade no pleno municipal.
Aproveitando a visita do parlamentario, o goberno local amosoulle tamén outros proxectos de relevancia para os que sería fundamental contar co apoio do goberno central, como por exemplo os encadrados dentro da estratexia de cooperación transfronteiriza no marco da Eurocidade Tomiño-Cerveira e a AECT Río Miño, destacando a necesidade de potenciar a cooperación nun tramo da fronteira polo que circula o 50% do tráfico de todo o Estado entre España e Portugal. Tamén se falou, entre outros, de proxectos para potenciar e recuperar a riqueza paisaxística e natural do río, como a Senda do Miño, ou a ponte peonil que pretende unir, a través do tramo máis estreito do río, a Fortaleza de Goián co parque do Castelinho de Vila Nova de Cerveira.
Tamén estivo presente na reunión o vicedirector da Agrupación Europea de Cooperación Territorial del Río Miño (AECT Rio Minho) e deputado de Cooperación Transfronteriza da Deputación de Pontevedra, Uxío Benítez Fernández, que instou a Rego a dar voz á problemática que afecta aos municipios transfronteirizos de ambas beiras do río en materia xurídica, debido ás incongruencias e diferenzas legais que existen entre os dous países e que dificultan o día a día dos veciños así como a realización de moitos proxectos.
Ningún comentario:
Publicar un comentario