A COMUNIDADE DE MONTES VECIÑAIS EN MAN COMÚN DA PARROQUIA DE A GUARDA ABRIU O “MIRADOR DO PEREGRINO”
· A área de descanso está situada preto de Bazar, a carón da ruta xacobea do Camiño Portugués pola Costa
Infogauda / A Guarda
A Comunidade de Montes Veciñais en Man Común da parroquia de A Guarda, que preside Manuel Castro Vicente, vén de comunicar que “a pasada fin de semana, aproveitando a ponte da Constitución, esta Comunidade de Montes, abriu o “Miradoiro do Peregrino”, para o uso público, camiñantes e paseantes, que todos os días percorren polo lugar, os ciclistas das distintas localidades que se achegan a nosa Vila, especialmente as fins de semana e tamén a todos os peregrinos que por medio do Camiño Portugués pola Costa, seguindo a Ruta Monacal, fan o traxecto A Guarda-Oia, na súa viaxe a Compostela”.
En relación a esa actuación ubicada preto de Bazar, a carón da estrada autonómica PO-552, Celso Rodríguez Fariñas, secretario da xunta reitora da Comunidade de Montes Veciñais en Man Común de A Guarda, refire: “Como se pode ollar nas imaxes, empregouse pedra do País, para as mesas e bancadas; instaláronse papeleiras, e plantouse unha serie de árbores nobles para que quenes queiran atopar un remanso de paz, contemplar a natureza e ollar o azul do ceo e do mar, poidan facer un descanso no seu desprazamento.
Foi intención desta Comunidade, recuperar e poñer en valor ese espazo que estaba bastante degradado, e o mesmo tempo que tivera unha utilidade colectiva. Consideramos que o logramos, pero cada quen terá a súa opinión, esperando que a maioría sexa positiva. Con iso nos conformamos, dándonos ánimos para seguir facendo máis e mellores obras que redunden no aproveitamento dos espazos da Comunidade e para disfrute do noso pobo.
Convidámosvos a disfrutar do “Miradoiro do Peregrino”.”
Ningún comentario:
Publicar un comentario