A GUARDA

A vila guardesa acollerá unha actividade de Orientación

· Que terá lugar o sábado día 1 de agosto, ás 10:00h, dende a Fortaleza de Santa Cruz

Infogauda / A Guarda   

 O vindeiro sábado 1 de agosto, en xornada de mañá, terá lugar a segunda Actividade de Orientación do Concello de A Guarda. 

 Dirixida por Xesta Natureza, este evento levará aos participantes polo casco urbano da vila, contribuíndo ao coñecemento do noso patrimonio natural, histórico e arquitectónico, e ao mesmo tempo tamén desvelará recunchos singulares.

 A proba dará comezo ás 10:00h dende a Fortaleza de Santa Cruz, e consistirá en atopar, en orde, unha serie de puntos (balizas), espallados polo entorno urbano do Concello. Para iso os participantes disporán dun mapa especificamente creado para este tipo de carreiras, e aínda que non se trata dunha proba competitiva, o equipo/persoa gañador será aquel que faga correctamente o seu percorrido no menor tempo posible. 

 Os participantes contarán para isto cunha tarxeta electrónica que lle facilitará a organización, para comprobar que o percorrido realizado é válido. Cabería salientar tamén que esta proba terá horarios de saída escalados, de xeito que ningunha persoa/equipo sairá ao mesmo tempo que outra co mesmo percorrido.

 Ao rematar a carreira, a organización disporá dun pequeno avituallamento para tódolos participantes, onde poderán comprobar en tempo real os resultados, grazas a un código QR impreso no mapa.

 A inscrición pódese facer de xeito individual ou en grupo (equipos), e existirán 3 categorías diferentes: 

Xestiñas (iniciación para nenas/os, se son menores de 9 anos deberán ir acompañados de un adulto); Xestas (adultos ou nenas/os con maior dificultade física e técnica); e Xesteiras (categoría só pensada para persoas con altos coñecementos en Orientación).

 Máis información e inscricións: http://www.xestanatureza.com/inscricions/aguarda2020