PONTEVEDRA

A Deputación de Pontevedra súmase ás accións polo Día Nacional da Lingua de Signos  

O Pazo Provincial iluminarase de cor turquesa desde este xoves 11 de xuño ata o vindeiro luns para poñer en valor as linguas de signos e darlles visibilidade

 Pazo da Deputación provincial de Pontevedra

Foto: D.PO.

Infogauda / Pontevedra

 A Deputación de Pontevedra únese á Organización de Diversidade Sensorial de Galicia, Xoga, para celebrar o Día Nacional da Lingua de Signos, que ten lugar cada 14 de xuño. Deste xeito, o Pazo Provincial tinguirase de cor turquesa dende a noite do xoves 11 ata o luns 15 de xuño co obxectivo de darlle visibilidade as linguas de signos e sensibilizar sobre a realidade das persoas con diversidade sensorial.

  O Día Nacional das Linguas de Signos Españolas aprobouse en 2014 e desde entón, celébrase cada ano o 14 de xuño xa que xusto ese mesmo día do ano 1936, constituíuse a Confederación Estatal de Persoas Xordas (CNSE). Este día é unha ocasión para lembrar o papel fundamental que xogan as linguas de signos para a transmisión de ideas, a relación persoal e social e o intercambio de coñecemento. Ademais sirve para chamar a atención do conxunto da sociedade coas persoas con diversidade sensorial. Así mesmo, serve para lembrar a necesidade de sumar esforzos para que estas persoas poidan exercer os seus dereitos.

  Á iluminación do Pazo Provincial, a institución sumouse á entrega de premios do xa clásico concurso provincial "Xoga coas Manciñas", que terá lugar este venres 12 de xuño. Este ano, debido a situación derivada pola Covid-19, realizarase nas redes sociais da Deputación de Pontevedra de forma virtual. Tamén a presidenta da Deputación, Carmela Silva, e as deputadas provinciais Olga García e María Ortega participan na campaña iniciada en redes sociais por XOGA coa difusión de vídeos baixo o lema "Eu amo a lingua de signos".