O ROSAL

O Concello do Rosal contratará a un socorrista para a praia das Eiras durante xullo e agosto  

· As persoas interesadas en participar no proceso selectivo poderán presentar a súa solicitude do 22 ao 26 de xuño 

    

Praia fluvial de Eiras (O Rosal)

Foto: C.O.R.

Infogauda / O Rosal

 O Concello do Rosal vén de poñer en marcha o proceso selectivo para a contratación dun socorrista para prestar servizo na praia das Eiras durante o meses de xullo e agosto. Será un contrato temporal a xornada completa no que a persoa contratada deberá desenvolver tarefas de vixiancia, prevención e salvamento de bañistas e demais persoas usuarias que acudan durante a tempada fluvial a esta praia e á súa contorna, así como o control das medidas sanitarias derivadas da nova normalidade consecuencia da crise do COVID. 

 As persoas interesadas deberán presentar a súa solicitude do 22 ao 26 de xuño a través do Rexistro ou na sede electrónica do Concello ou ben cun xustificante de presentación de solicitude a través doutro medio ao correo electrónico notifica@concellodorosal.es ou ao fax 986 626 034. As solicitudes deben ir acompañadas da documentación requerida nas bases do proceso selectivo, entre a que se atopa a copia da inscrición no Rexistro Profesional de Socorristas Acuáticos de Galicia.  

 A selección realizarase a través dun concurso-oposición no que se fará unha valoración dos méritos por experiencia profesional, por cursos de formación e perfeccionamento e por coñecemento da lingua galega. Ademais faranse unha serie de probas prácticas obrigatorias e eliminatorias.