O
BAIXO MIÑO INCORPORARÁ DÚAS NOVAS MESTRAS E MESTRES COMPOSTEIROS PARA ATENDER OS
CENTROS DE COMPOSTAXE COMUNITARIA NA COMARCA A PARTIR DO DÍA 15
A Deputación acolleu hoxe a selección de destinos
deste persoal, que pasa a ser laboral interino nos concellos de A Guarda e Tui e
se suma aos de Tomiño e O Rosal
A institución provincial, ao abeiro do Plan
Revitaliza, pagará cunha subvención o salario íntegro este ano e parte nos dous seguintes
O deputado provincial Uxío Benítez na reunión telemática celebrada no día de hoxe
Fotos: D.PO.
Infogauda / O Baixo Miño
O Baixo Miño contará con dúas novas mestras e mestres composteiros para
atender os centros de compostaxe comunitaria na comarca a partires do vindeiro
día 15 de maio. Segundo explicou o
deputado Uxío Benítez Fernández, este persoal pasará a ser laboral interino nos concellos
de A Guarda e Tui, se ben será a propia institución provincial a que, por medio
dunha subvención ao abeiro do Plan Revitaliza, fará fronte ao salario íntegro dos
oito meses que quedan este ano, e a parte nos dous exercicios seguintes (50% no
2021 e 30% no 2022).
Así, a partir de mediados de mes, ademais de ter o asesoramento
e colaboración da equipa provincial do plan de compostaxe, os concellos ‘Revitaliza’
da comarca estarán atendidos por persoal propio, xa que O Rosal conta cun técnico
‘adxudicado’ na anterior liña de axudas, e Tomiño con dous. Nos primeiros días
a previsión é que as/os mestres composteiros (MECOS) realicen tarefas de ‘achegamento’,
para despois realizar un labor moito máis exhaustivo de control ‘in situ’, así
como de seguimento tamén dos composteiros individuais e promoción da compostaxe
en xeral.
Dado que o tratamento de lixo está considerado un servizo
esencial, nestes momentos de crise sanitaria están activos todos os centros de
compostaxe da provincia dependentes do Revitaliza. Estes son atendidos por un
servizo básico de mestras e mestres composteiros da Deputación que realiza os
labores de control do proceso así como de mantemento das garantías sanitarias.
Durante as semanas do estado de alarma a equipa do Revitaliza ten constatado un
aumento moi significativo das achegas de residuos orgánicos nos composteiros.
De feito, o nivel de enchido tense duplicado como media e case
cuatriplicado nalgúns centros de compostaxe comunitaria.
Segundo lembrou o deputado responsable do Revitaliza Uxío Benítez, para a concesión das subvencións da Deputación aos concellos tivéronse en conta diferentes parámetros. Principalmente, a experiencia acumulada no tratamento dos residuos orgánicos a través da compostaxe tanto nos centros de compostaxe comunitaria (CCC) como a través de composteiros individuais de exterior (COIN), ademais da realización doutras accións destinadas a fomentar a separación en orixe da FORM e a reciclaxe do resto das fraccións.Tamén se valorou a posibilidade de que os concellos teñan posibilidade de acadar o tratamento progresivo da totalidade da fracción orgánica de residuos municipais por medio de composteiros.
No día de hoxe celebrouse a selección de destino dos mestres e mestras baixo a supervisión do deputado, do asesor Carlos Pérez, así como doutro persoal técnico provincial. Os MECOS irán tamén a outros concellos: Illa de Arousa, O Grove e Valga na zona do Salnés; Bueu, Cangas, Vilaboa e a Mancomunidade no Morrazo; Mondariz e As Neves no Condado; Gondomar no Val Miñor; e Poio e Ponte Caldelas na comarca de Pontevedra. Finalmente, ademais, foi preciso seleccionar outra persoa máis para cubrir a baixa do mestre composteiro do Concello de Ponteareas, concedido na anterior subvención da Deputación.
Hai que lembrar que na primeira axuda á contratación de persoal aos concellos adheridos ao plan de compostaxe provincial puxéronse en marcha trece postos técnicos para os concellos de Tomiño (2), Soutomaior, Moaña, O Grove, Illa de Arousa, Cambados, Baiona, Mondariz, Sanxenxo, Ponteareas, As Neves e O Rosal. Todos eles están sufragados económicamente en parte aínda agora pola Deputación de Pontevedra.
Ningún comentario:
Publicar un comentario