MOAÑA

A CIG-Saúde denuncia a falta de cobertura de médico/a no PAC de Moaña o domingo 16 de 15:00 a 22:00 horas 

Dende a central lembran que neste horario o centro conta habitualmente con dobre equipo facultativo/a-enfermeiro/a

 Infogauda / Moaña

 A federación de Saúde da CIG de Vigo vén de denunciar que o Punto de Atención Continuada (PAC) de Moaña quedou sen falta de cobertura de persoal médico o pasado domingo 16 de 15:00 a 22:00 horas, cando o habitual neste horario é que haxa un dobre equipo facultativo/a-enfermeiro/a. Dende a central critican que esta falta de cobertura non se produciu como consecuencia dunha ausencia imprevista, “senón que era coñecida con antelación pola xerencia”. 

 Durante ese período de tempo o centro estivo atendido cun equipo completo e cunha enfermeira a maiores, que en caso de saída do equipo quedaría soa no centro tendo que resolver os problemas médicos que entran no centro ou as asistencias fóra do centro que se puideran dar. “Lembramos que esta situación deixa a traballadora nunha situación de indefensión, porque como é coñecido o colectivo de enfermaría non pode prescribir medicación, xa que precisa a orde dun facultativo/a”. 

 Como consecuencia, a localidade quedou con menos atención médica da habitual, por debaixo das necesidades da poboación e coa conseguinte sobrecarga do persoal médico que realizaba traballo no centro. 

 Os traballadores/as do centro de saúde amosaron a súa preocupación polo acontecido e temen a que se poida repetir a non cubrir ausencias, “sobre todo cando a fin de semana do 1 de marzo se vai ter lugar a OPE de Medicina de Familia e Comunitaria e o boa parte do persoal médico dos PAC vai realizar as probas xa que unha proporción elevada é eventual; e cando, ademais, coincide coa celebración do Entroido”.