CULTURA

Tomiño convértese no primeiro concello Mecenas da Casa de Rosalía  

• Este mediodía a alcaldesa do municipio arraiano, Sandra González, visitou a Casa-Museo de Rosalía, onde foi recibida  polo seu presidente Anxo Angueira  

• Este concello xa apoiara a creación da Casa Museo en 1953 con 500 pesetas e en 1971 cunha achega de 2.000 pesetas  

• En virtude deste convenio, tanto os escolares do municipio como as asociacións culturais poderán ter visitas guiadas de balde á Casa de Rosalía 
 

A alcaldesa do Concello de Tomiño, Sandra González con Anxo Angueira, presidente da Fundación Rosalía de Castro, acompañados dunha atriz e un actor, representando á Rosalía de Castro e a seu esposo Manuel Murguía, respectivamente, hoxe na Casa da Matanza, en Padrón (A Coruña)
Fotos: Casa Museo de Rosalía de Castro

Infogauda / Padrón

 A alcaldesa de Tomiño, Sandra González, visitou  esta mañá a Casa-Museo Rosalía de Castro para confirmar que se converterá no primeiro concello Mecenas da Casa de Rosalía, tal e como aprobou o pleno do Concello o pasado 26 de decembro. Este acordo forma parte do proceso de subscrición popular para implicar a empresas, entidades públicas e persoas individuais na mellora e no sostemento da causa común da Casa da Matanza, “que é a causa común de Galicia”, en palabras do seu presidente Anxo Angueira.  

 En virtude deste acordo, polo que o Concello de Tomiño achega 2.000 euros, tanto os escolares do municipio como as asociacións culturais poderán ter visitas guiadas de balde á Casa de Rosalía. Con esta decisión Tomiño refrenda así o seu compromiso histórico con esta institución, dado que xa apoiara economicamente a súa creación en 1953 cunha doazón de 500 pesetas e en 1971 -previa á apertura da Casa-Museo- de 2.000 pesetas. 

  

No centro da imaxe, a comunicación da doazón que en abril de 1953 remesou o Concello de Tomiño ao presidente do Padroado "Rosalía de Castro", e que figura exposta na Casa-Museo de Rosalía de Castro

 Centos de persoas de todo o país -e máis alá- xa se converteron en Amigas da Casa de Rosalía ao apoiar desde 20 euros ao ano a independencia económica e cultural desta institución, así como a súa sostibilidade financeira. A subscrición popular está a ser un grande éxito e moitos pequenos negocios tamén son xa Protectores (desde 60€/ano), así como varias grandes empresas da comarca, que xunto cos concellos poden exercer de Mecenas da Casa a partir de 1.000 euros ao ano.  

Segunda subscrición popular  

Anxo Angueira conversa con Sandra González na visita da alcaldesa de Tomiño, á Casa-Museo de Rosalía de Castro

"Abride esa fiestra, que quero ver o mar"

Rosalía de Castro

 A Casa de Rosalía está sostida pola Fundación Rosalía de Castro, unha fundación privada sen ánimo de lucro que foi creada en 1947 por persoas vencelladas ao galeguismo nos tempos difíciles da ditadura. A apertura da Casa-Museo en 1972 só foi posible grazas á colaboración económica de familias e empresas e institucións de todo o país e do mundo da emigración.   

 Daquela participaron centos de persoas anónimas de Galicia a partir da proposta de José Manuel Rey de Viana, organizáronse colectas en moitas vilas e en case todos os centros galegos na emigración, uníronse máis de 60 concellos, varios bancos, a Federación de Caixas de Aforros, o R. C. Celta de Vigo, a Federación Galega de Ciclismo e innumerables asociacións de todo o país. Ao final, colleitouse un total de 994.043 pesetas en 1971.  

 Case 50 anos despois esta institución –que non recibe financiamento público regular que asegure o seu mantemento anual nin o seu futuro– quere reafirmarse na súa independencia económica e cultural e no apoio das xentes comprometi-das co país e coa súa cultura.   

Autofinanciamento do 41%  

 A Casa-Museo xa ten unha taxa de autofinanciamento do 41% (2018, que evoluciona desde un 20% en 2012), cifra considerable na nosa contorna cultural, “mais entendemos que cómpre aínda percorrer camiño na procura dun mellor servizo a prol da difusión do legado de Rosalía e da súa familia”, afirma Anxo Angueira, presidente da Fundación. A evolución das visitas á Casa tamén é positiva: incrementáronse desde 2012 ata 2018 nun 237% (de 8.655 a 20.571).   

 A Fundación Rosalía quere continuar neste vieiro para “asegurar o seu presente e, sobre todo, o seu futuro, para seguir avanzando na mellora da Casa-Museo, da súa xestión e dos seus servizos”, continúase desde a Fundación, que afirma que é xa un dos museos galegos máis visitados “e debe estar na vangarda cultural e ser un referente a nivel nacional e tamén internacional”.   

 Anxo Angueira, referencia actual da institución rosaliana, salienta que “aínda que somos escoitados polas institucións públicas de Galicia, queremos que o esforzo colaborativo sexa tamén un esforzo comunal e compartido polo pobo galego, que sempre foi xeneroso con todo o que tiña que ver con Rosalía para que a Casa da Matanza e as súas instalacións sexan dignas da figura que representan”.  

 A Casa de Rosalía incrementou exponencialmente os proxectos e actividades desde 2012. Alén da desexada reforma do interior da Casa e da súa renovada musealización, catalogouse e dixitalizouse todo o fondo documental e acondicionouse unha sala para o arquivo, que xa está a disposición dos investigadores; dinamizou-se a súa presenza na web e nas redes sociais; incrementouse o seu patrimonio coa chegada de novos obxectos, artísticos ou non, como o cadro de Brocos e diferentes pezas de Ovidio Murguía; publicouse a súa Obra completa, entre outros libros; relanzouse a celebración do Día de Rosalía e puxéronse en marcha ducias de actividades ao longo do ano: a homenaxe ao mundo do mar, o festival Abride a Fiestra, alén de múltiples exposicións, conferencias, roteiros, teatralizacións e visitas guiadas.   

Vídeo “Faite Amiga/o da Casa de Rosalía”: https://youtu.be/4_rxqF4mGDI