A GUARDA

XIV ENCONTRO DE EMBARCACIÓNS TRADICIONAIS DE GALICIA

A GAMELA E O VOLANTEIRO XA COMENZARON SÚA SINGRADURA POSTAL

Coa posta en circulación de dous selos e mataselos conmemorativos, concedidos pola Dirección Xeral de Correos
 

Luciano Lomba Vicente - a der. da imaxe -, con Rosa Silva Rivera, Celso Rodríguez Fariñas e Marcelino Portela Lorenzo, no intre da posta en circulación do mataselos e selos conmemorativos
Fotos: Infogauda

Ricardo Rodríguez Vicente / A Guarda

 Ainda que o XIV Encontro de Embarcacións Tradicionais de Galicia non comeza oficialmente ata o vindeiro xoves día 11, a programación cultural dese evento xa soltou amarras. E fíxoo na tardiña deste luns día 8 de xullo de 2019, coa posta en circulación de dous selos, unha tarxeta, un sobre e un mataselos conmemorativos, dese importantísimo evento vencellado ao Patrimonio Marítimo. 

 Nun dos selos, reprodúcese unha fotografía antiga da autoría de Felipe Prósperi Cortechi (Italia, 1814 - Vigo, 12 de maio de 1899), que forma parte do Arquivo Pacheco, do Concello de Vigo, e que segundo a investigadora e fotógrafa Fernanda Padín Ogando, debeu ser tomada en 1892. Nesa imaxe fotográfica pode apreciarse perfectamente o varadoiro da Ribeira, no porto de A Guarda, onde atopábase varada unha importante frota de volanteiros, molleiros e  gamelas. Cecais a fotografía foi tomada nalgún mes do inverno e os mariñeiros non sairan a faenar.

 Esa mesma fotografía foi a que a Asociación Cultural de Embarcacións Tradicionais Piueiro elexiu como para o XIV Encontro de Embarcacións Tradicionais de Galicia. Dese xeito figura en toda á cartelería editada, programas de mán, etc., e tamén foi a imaxe que a Sociedade Filatélica e Numismática Guardesa (SFNG) decidiu pór nas tarxetas e sobres que editou para a mostra filatélica adicada ao Mar, que hoxe inaugurou. 

Mataselos, selos, sobres e tarxetas postais da exposición filatélica adicada ao Mar

 
 O outro selo conmemorativo reproduce unha fotografía antiga dunha gamela que entra no porto de A Guarda coa vela despregada.

  Presidido por Luciano Lomba Vicente, presidente da SFNG e coa presenza de varios directivos e asociados desa entidade, así como de Celso Rodríguez Fariñas, en representación da Asociación Piueiro, o acto da posta en circulación de devandito material filatélico contou tamén coa participación de Rosa Silva Rivera, directora en funcións da oficina de Correos de A Guarda, por atoparse de vacacións José Luis Franco Rodríguez, director titular da devandita oficina postal.

Vista parcial da exposición filatélica adicada ao Mar

 Na imaxe algunhas das obras de José Carlos Castro Martínez

  Trala posta en circulación do mataselos e selos conmemorativos, concedidos a S.F.N.G. pola Direción Xeral de Correos, deuse por inaugurada a exposición filatélica na que participan as seguintes coleccións:

· "Un vocabulario para el mar", de Isidoro Dans Lomba.
· "Correspondencia entre aguas", de Marta Verde Rodríguez.
· "Surcando las aguas", de Mª Teresa Castro Martínez.
· "Los faros, el origen de las señales marítimas", de Manuel Martínez Rial.
· "Faros y otras ayudas a la navegación", de Miguel Martínez Pérez.

 Ademais desas coleccións, tamén expóñense dibuxos e fotografías de José Carlos Castro Martínez. 

  A exposición poderá visitarse ata o vindeiro día 14 de xullo, nos seguintes horarios:

 · De 10:00 a 13:30 horas.   
 · De 18:00 a 21:00 horas.