A GUARDA

O peixe espada vence á choiva e reina na festa que lle adica A Guarda  

• José Loira, secretario xeral de Pesca entre os anos 1987 y 1996, destacou no seu pregón a capacidade de loita e vontade de emprendemento dos guardeses, "que lles levou a destacar sempre no mundo do mar e boa proba diso é o que conseguiu  Orpagu nos últimos anos".  

• Durante os dous días de festa cociñaranse 1.200 quilos de peixe espada, que se presentarán ao público en diversos formatos culinarios.  

O peixe espada pode degustarse en variedade de preparacións culinarias

Mar Bermúdez / A Guarda

 O orballo, esa choiva liviá tan característica de Galicia, foi un elemento máis da primeira xornada da  Festa do Peixe Espada, o evento organizado pola Organización de Palangreiros Guardeses (Orpagu) en colaboración co  Concello da Guarda. A súa presenza nesta décimo sexta edición non desluciu en nada a brillantez da organización desta cita de referencia no Baixo Miño. 

 O pregón co que se inaugurou a festa correu este ano a cargo de José Loira Rúa, o que fose secretario xeral de Pesca entre os anos 1987 e 1996. A súa intervención, marcada polo recordo do seu paso pola Secretaría, fixo referencia ao espírito loitador e ao carácter emprendedor dos guardeses, así como ao labor que vén realizando Orpagu desde a súa constitución "en favor da modernización do sector". Loira tamén adicou uns momentos para homenaxear ás mulleres da zona e á especie protagonista da celebración, o peixe espada, que cualificou de "extremadamente saboroso". 

 Tras a súa intervención, entregouse o cheque regalo de 100 euros e un trofeo realizado polos alumnos do centro San Xerome Emiliani á autora do cartel da festa deste ano, a nena Sara Lomba. Pola súa banda, un representante do Club Deportivo Sen Amarras presentou a cuarta edición do Campionato Galego Inclusivo de Náutica Adaptada, organizada por esta agrupación en colaboración coa Federación Galega de  Motonáutica. 

 A da Guarda é a terceira proba do campionato autonómico, tras as de Tui e Boiro, e contou coa participación dunha ducia de equipos, formados por piloto e tripulante.   

Música, historia  e 1.200 quilos de peixe  espada 

 O documental "Historia  mariñeira da Guarda" e o  Encontro dous  Pobos, coa actuación dos grupos locais de música e danza (Vento  Mareiro e  Do  Lusco e Fusco), un de Polonia (Poligrodzianie) e outro de Austria (Steirischer Schwung) formaron parte do programa festivo da primeira xornada da  Festa  do  Peixe Espada. Pero non foron os únicos, o Grupo A  Boalleira, o Mago  Zanas e a agrupación de acordeóns  Mascarenhas encargáronse de amenizar a tarde/noite ás numerosas persoas que se achegaron ata A Guarda. 

 A parte gastronómica do evento estivo presente ao longo de  toda a xornada. Ata 1.200 quilos de peixe espada serviranse ao longo destes dous días, en 15 elaboracións diferentes. Desta forma, na  carpa instalada no Portiño Novo poderanse seguir degustando ata mañá pola noite as racións de peixe espada con patacas, en guiso, en  fideuá, en  tostas, en empanada, como  zorza, en albóndegas ou en  salpicón. Unha infinidade de variedades para gozar dun prato exquisito, san e moi saboroso. 

Hoxe haberá música, deporte e moito máis  

 Este domingo pola mañá terá lugar a presentación oficial de  Ecodestin-Sensea, unha iniciativa de turismo mariñeiro inclusivo de  Bluscus, nun acto que contará coa participación dun representante da Consellería  do Mar. Para os amantes da música,  a banda de música da Agrupación Musical de A Guarda encargarase de amenizar a mañá cun repertorio especial con motivo da festa. Xa pola tarde, os asistentes ao evento gastronómico e cultural poderán gozar dunha  regatilla organizada polo Club de Remo Robaleira, e de diferentes actuacións musicais a cargo das agrupacións  Xamaraina,  Deixa Andar e Coros  Cantábile e  Arpegios.