MOVEMENTOS SOCIAIS

A plataforma SOS Sanidade Pública convocou concentración en Vigo, este mércores ás 20 h. diante do MARCO   

Texto do manifesto do fin da concentración

 A política sanitaria de Núñez Feijoo e o seu goberno da Xunta pretende por a toda a sanidade pública galega en mans de empresas privadas multinacionais.

 Na área sanitaria de Vigo temos sobradas mostras de esta política sanitaria: o modelo de construción e xestión do novo hospital, o concerto con POVISA, o mantemento de GALARIA, a infra dotación de recursos asistenciais, que producen unha insoportable lista de espera e derivación de actividade á sanidade privada, etc.

 En Vigo, a apertura do Hospital Álvaro Cunqueiro non mellorou a capacidade de dar unha resposta de calidade e en tempo razoable ás necesidades da cidadanía e creou problemas novos de relación entre a empresa propietaria do Hospital e a Xerencia da EOXI, como pon de manifesto o actual conflito coas Auxiliares de enfermaría.

 A reforma da lei de saúde consolida este modelo e marxina á Atención Primaria, que está cada ano máis debilitada, como podemos ver estes días co peche de centros de saúde pola tarde, recortes nas consultas de pediatría e sobrecargas nos centros de saúde e nos PACs da área de Vigo.

A Consellería de Sanidade esta utilizando a Reforma da Lei Galega de Saude para:

· Desmantelar as áreas sanitarias e os hospitais comarcais.

· Baleirar de recursos e competencias os centros de Atención Primaria coa finalidade de acabar coa promoción da saúde e a prevención da enfermidade, dificilmente convertibles en negocio.

· Por en mans de multinacionais farmacéuticas e da industria tecnolóxica a investigación, innovación, desenvolvemento e información, realizada con recursos e fondos públicos.

· Reducir prazas, mantendo a inestabilidade e precarizando as condicións laborais das traballadoras/es do sistema público, para favorecer ao sector privado.

· E mentres reduce recursos sanitarios públicos utiliza a Lei de Garantías de tempos de espera para desviar a centos de pacientes a centros privados.

 A Consellería de Sanidade da un paso máis, mudando o papel que xogan os centros sanitarios privados, que tiñan un carácter complementario e subsidiario, e cos que se concertaban patoloxías menores como cataratas ou varices co obxectivo de alixeirar as listas de espera, pero agora poñen en marcha un novo modelo onde se pasa a concertar con empresas privadas, por un período de catro anos, actividades de consulta, cirurxía, probas diagnósticas e terapéuticas  e mesmo hemodiálise. Un transvase de actividade asistencial que ascende, a un total de 97,5 millóns de euros, no caso da Coruña onde xa se puxo en marcha, co agravante de que o persoal facultativo público deberá ir a estes centros privados.

 Isto supón a privatización da bata branca, que Feijóo dixo que nunca faría  e enormes beneficios para o negocio de empresas sanitarias privadas.

 Xunto a isto, a Consellería de Sanidade pretende tamén facilitar e potenciar a dedicación público privada dos profesionais do sistema público, eliminando a dedicación exclusiva, que xera máis corrupción e conflitos de intereses en detrimento da calidade da asistencia á cidadanía.

 En definitiva se desacredita e debilita ao sector publico para facilitar a penetración do sector privado en detrimento da saúde da poboación e dos fondos públicos que pagamos cos nosos impostos.

 A privatización é corrupción!

 Por todo isto temos que manter a presión para acabar coa corrupción sanitaria do PP.