OIA

CORPORACIÓN MUNICIPAL E VECIÑOS DE OIA, XUNTOS NA HOMENAXE Á XULIA SUÁREZ

Dende onte, unha fermosa praza, a carón da Casa do Concello, relembra o agarimo á matrona, falecida prematuramente

A alcaldesa de Oia, con familiares e amiga de Xulia Suárez Martínez

Fotos: C. O.

Infogauda / Oia

 Pouco despois do mediodía de onte, 29 de outubro de 2017, fíxose realidade á homenaxe póstuma a que fora matrona en Oia, Xulia Suárez Martínez. 

 O acto contou coa asistencia da alcaldesa, Cristina Correa Pombal, membros da Corporación Municipal de Oia, familiares, amigos, e sobor de todo, veciñas e veciños do termo municipal, que quixeron estar - i estiveron -, a carón de Julia Martínez, nai da gratamente relembrada Xulia Suárez, e doutros familiares.

A cidadanía de Oia, arropou á homenaxe a Xulia Suárez

 En nome da familia, interviu Pablo Alonso, sobriño de Xulia, quen tivo verbas de agradecemento para o BNG, por ser a entidade que promoveu á homenaxe, a toda á Corporación Municipal do Concello de Oia, por aprobar unánimemente á proposta, e a tódolos veciños, e sobor de todo, ás mulleres oienses por este recoñecemento á Xulia Suárez.

Vista parcial da asistencia de público ao acto de homenaxe 

 A alcaldesa de Oia, Cristina Correa agradeceu á presenza das mulleres que en primeira persoa, foron testigos do entusiasmo e humildade co que Xulia desenvolvía súa labor, salientando ademáis, a traxectoria laboral da matrona que estaba carregada de humanidade e de implicación.

 Alcaldesa e familiares de Xulia Suárez 

 Tamén interviu Sabela Estévez, militante do BNG - formación da cal formaba parte Xulia Suárez -, e amiga íntima da persoa homenaxeada, para relembrar á enorme labor humana que Xulia deixou tras de sí en Oia.

 No decurso da homenaxe, foi descuberta unha placa que da nome a Praza da matrona Xulia Suárez, e na que se reproduce unha obra artística da pintora Irene Silva Xiráldez, de Belesar (Baiona), que tamén estivo presente nese emotivo acto. 

 A pintura de Irene Silva representa unha nai co seu bebé no colo, e que inclúe á seguinte estrofa: 

O cantar que canta a nai

cando arrola o seu neniño,

meu caravel, miña rosa, 

meu bico de paxariño.

(Cantiga tradicional)

 "(...) Quedeilles moi agradecida de que contasen comigo e síntome moi honrada de ver unha obra miña participando na memoria de Xulia Suárez, no Concello de Oia (...)", dixo Irene Silva Xiráldez a Infogauda. 

 En nome da Corporación Municipal e da cidadanía de Oia, foille entregado un ramo de flores a Xulia Martínez.

  

 As notas musicais, foron ceibadas o ar de Oia, polos compoñentes do grupo de gaitas "Tralo Mosteiro".

 Dese xeito, emotivo e sinxelo, logo dunha recollida de 1.110 sinaturas nunha plataforma dixital, e do correspondente acordo plenario, toda Oia soubo agradecer á labor profisional e humana de Xulia Suárez Martínez. Unha muller activa e xenerosa, que desde 1983 a 2004, axudou como matrona a moitas mulleres oienses, e que contribuiu a facer País.