A GUARDA

CULTURA

A BANDA CREBINSKY PROTAGONIZOU A SEGUNDA EDICIÓN DE NOITES NO CASTELO    

O público voltou a gozar coa segunda edición das Noites do Castelo

Fotos: C.A.G.

Infogauda / A Guarda

 A Fortaleza de Santa Cruz converteuse no centro de atención desta pasada fin de semana na Guarda. Tras acoller a inauguración do Centro de Interpretación das fortalezas transfronteirizas, o venres día 8 de xullo, o sábado foi o escenario da segunda edición de Noites no Castelo.  

 Despois do éxito que tivo esta iniciativa o ano pasado, coa proxección do filme “A Esmorga”, decidiuse repetir a experiencia e aproveitar a fermosa contorna desta fortaleza para ofrecer unha película e un concerto de balde coa fin de amenizar o verán guardés.  

 Os escollidos para protagonizar o evento Noites no castelo deste ano foron a Banda Crebinsky, un grupo musical xurdido a raíz do mundo imaxinario creado para o filme “Crebinsky” e da banda sonora que se realizou para este. 

O cinema galego voltou a Fortaleza de Santa Cruz coa proxección do filme “Crebinsky”

 Pasadas as 22:00 horas daba comezo a velada cunha pequena charla introdutoria a cargo de Sergio Zearreta e Enrique Otero (protagonista e director do filme), acompañados dunhas palabras de presentación de parte da concelleira de Cultura do  concello da Guarda, Elena Baz. De seguido os asistentes puideron visionar o recoñecido filme “Crebinsky”, gañador do premio a mellor guión novel do Festival de Málaga.  

A Banda dos Crebinsky en pleno concerto na Fortaleza de Santa Cruz

 Para rematar a xornada, pasada a media noite, deu comezo o concerto da Banda dos Crebinsky, que invitaron a todos os alí presentes a desfrutar e moverse ó ritmo da súa música, unha música que eles mesmo clasifican como composicións eclécticas-delirantes ou música popular de un país inexistente nun concerto que se estendeu ata pasadas as 2 da madrugada.