A GUARDA.

O CONCELLO E O CENTRO DE INFORMACIÓN Á MULLER FIXERON PÚBLICO UN MANIFESTO CONTRA Á VIOLENCIA DE XÉNERO

María Teresa Baz Vicente, Montserrat Magallanes Álvarez e Antonio Lomba Baz

Foto: C.A.G.

 Dende o Concello da Guarda e o Centro de Información á Muller queremos manifestar a máis absoluta e enérxica condena ante as inadmisibles situacións de violencia que, aínda que pareza inconcibible, se seguen a producir. A violencia de xénero constitúe unha lacra de carácter mundial, un atentado contra os dereitos humanos e a dignidade das persoas que impiden á nosa sociedade continuar avanzando. 

 A loita contra a violencia é unha tarefa común, hai que aunar esforzos e compromisos, se queremos que a violencia de xénero desapareza.  

 Por iso é tan importante levar a cabo iniciativas tendentes a: 

• Mellorar a prevención, a través do incremento de medidas de sensibilización e educación, xa que se ven observando que as novas xeracións están incidindo  na reprodución de patróns machistas nos seus relacionamentos. 

• Ofrecer formación específica aos profesionais que traballan con vítimas de violencia, para evitar moitas veces a vitimización secundaria. 

• Solicitar maiores medios que garantan a protección e seguridade tanto da muller como dos seus fillos e fillas e persoas delas dependentes, co obxectivo de rematar co goteo incesante de mulleres asasinadas a mans das súas parellas.  

• Mellorar as políticas sociais con medidas, como  o aumento do orzamento para axudas específicas inmediatas para as vítimas, así como a creación de itinerarios específicos de emprego que lle permitan independizarse do seu agresor, xa que moitas delas carecen de recursos económicos propios. 

• Mellorar o itinerario xudicial polo que teñen que atravesar unha vez que deciden romper co ciclo de violencia e denunciar ao seu agresor.    

 Desde o Concello da Guarda asumimos o noso compromiso persoal e profesional nesta loita contra calquera acto que atente contra a integridade e dignidade da muller,rexeitando todo tipo de agresións e violencia machista, apoiando as vítimas e transmitindo as xeracións futuras o respecto á igualdade de mulleres e homes para defender unha sociedade xusta e paritaria na que mulleres e homes poidamos participar equilibradamente en todos os ámbitos e tomar conxuntamente as decisións que nos afectan.

(R.)