A GUARDA

O PP da Guarda levou 5 mocións a pleno e 10 preguntas ao Grupo de goberno

Compoñentes do Grupo Municipal do Partido Popular no Concello de A Guarda

Infogauda / A Guarda

 O Grupo Popular da Guarda presentou no para o seu debate no pleno celebrado o martes día 28 de xullo de 2015, cinco mocións distintas e preguntou ademais por varias cuestións de interese local.

TURISMO

 Entre as preguntas ao Grupo de Goberno destacou o interese dos populares "pola promoción e a evolución do Turismo de A Guarda".

 A voceira do PP, Conchi Ortega, preguntou "se había datos do número de visitantes ao concello durante o que levamos de verán, posto que sería importante saber, segundo ela, se se incrementou o Turismo como na media do resto dos concellos, posto que é importante para facer un seguimento das visitas e mellorar, na medida do posible, as campañas de promoción de A Guarda".

 Neste sentido preguntaron tamén polas medidas que se adoptaron para a promoción do turismo e pola colocación das vallas publicitarias do concello convidando aos turistas a visitar a vila guardesa.

 En canto á Festa da Lagosta, os populares esixíronlle á responsable de Turismo que "explicara porque nesta ocasión só había na carpa 4 restaurantes cando normalmente se xuntaban máis de unha ducia".

ACTOS VANDÁLICOS

 Os populares, preocupados polo aumento de actos vandálicos nos últimos tempos, como por exemplo as pintadas no Centro Cultural, preguntaron ao Grupo de Goberno "(...) se durante a celebración da Festa do Monte Santa Trega van permitir a acampada en calquera zona do Concello ou van habilitar unha zona para elo".

 Os populares consideran que "o Goberno local ten que explicar tamén que medidas se van tomar para controlar estes actos vándalicos durante a noite e se se van colocar baños na zona da Alameda durante as festas".

PLAN DE LIMPEZA

 Tralas queixas dos veciños ao estado das rúas e beirarrúas de A Guarda, sucias e con manchas aínda da Festa do Monte Santa Trega do ano pasado, Conchi Ortega preguntou ao Grupo de Goberno "o motivo polo que non se limpaban as beirarrúas coas máquinas axeitadas como se fixo noutras ocasións. (O ano pasado empregouse unha hidrolimpadora)".

 Os populares non poñen en dúbida o traballo dos limpadores municipais, pero si a falta de medios para facer o seu traballo.

 Por iso, os populares suxeríronlle ao Grupo de Goberno "(...) que alugase, se non podía comprar, as máquinas necesarias para facer unha limpeza en condicións e deixar ben limpas por unha boa temporada, as rúas e beirarrúas da Guarda".

PROTECCIÓN CIVIL

 En canto á situación do voluntariado de Protección Civil, os populares preguntaron "se a agrupación municipal estaba preparada para saír a facer calquera actuación de emerxencia, se había un coordinador interno na agrupación e se estaban rexistradas as persoas voluntarias que traballan na actualidade".

 Ortega preguntou ademais cando ten pensado o Goberno local reparar a varanda de protección da Rúa Circunvalacion que ao ter os anclaxes podres supoñen un gran perigo para os viandantes. O grupo maioritario da oposición criticou "o lamentable estado das instalacións de skate e do mobiliario de xogos infantís nas inmediacións do Museo do Mar nos que ademais está previsto a celebración do Galifornia Beat" e preguntaron o grupo de goberno "cando teñen pensado arranxar o problema dos vertidos de fecais que hai na praia do Fedorento".