LECER

OS CAMIÑOS DO TREGA, PRÓXIMO DESTINO DOS PARTICIPANTES EN SENDEIROS RÍAS BAIXAS

         Vista da foz do río Miño desde o Monte Santa Trega (A Guarda) 

Foto: Infogauda

·       Trátase dunha ruta de 7,7 quilómetros, de dificultade media e no que os camiñantes poderán coñecer unha das paraxes máis atractivas da provincia

O vindeiro domingo, 1 de xuño, terá lugar a segunda das andainas incluídas no programa de Sendeiros Rías Baixas, que levarán aos camiñantes a coñecer unha das paraxes máis atractivas da provincia, como é o Trega e o seu contorno.

A actividade dará comezo ás 10,00 horas no Mirador de Areses, onde os camiñantes recibirán información sobre a ruta, así como consellos para que a andaina resulte o máis doada e divertida. Desde este punto, e na compaña de guías especializados, iniciarase un percorrido a través de pequenos carreiros que ascenden polas ladeiras do Monte ata a Ermida de Santa Trega, onde se poderá disfrutar non só visitar o seu afamado castro, a Pedra Furada e todo o contorno, senón de espectaculares panorámicas.

Combinar deporte e turismo

Coa organización destas rutas, a Deputación de Pontevedra pretende promover hábitos de vida saudable e contribuír á difusión e posta en valor dos recursos naturais, arqueolóxicos, etnográficos e arquitectónicos da provincia.

Así, á ruta do Tegra que terá lugar este domingo e á que xa se realizou en Cangas, sumaranse nos vindeiros meses a de Adro Vello-Con Negro en O Grove, o 14 de setembro; a Ruta da Auga, as fontes e os lavadoiros de Parada, en Silleda, o 12 de outubro; e das Pontes do Lérez, en Forcarei, o 1 de novembro.

Exceptuando a ruta de Forcarei, que ten unha lonxitude de case 14 quilómetros, as demais sitúanse todas no contorno dos 7 quilómetros e son todas de dificultade baixa ou media, co obxectivo de facilitar a participación non só das persoas xa acostumadas á práctica do sendeirismo, senón a de todas aquelas ás que lle guste camiñar e disfrutar da natureza.