PONTEVEDRA

A DEPUTACIÓN INICIOU HOXE OS OBRADOIROS DE AUTOEMPREGO E COOPERATIVISMO NO MEDIO RURAL NA MANCOMUNIDADE DO ULLA

·        A próxima xornada desenvolverase o mércores 9, na que os asistentes recibirán formación sobre Fórmulas de autoemprego

A Deputación de Pontevedra iniciou hoxe no concello de Portas, os obradoiros de autoemprego e cooperativismo no medio rural no marco do proxecto aQuelando3, nunha xornada na que estivo presente a deputada provincial Begoña Estévez.  

Durante a mañá, os técnicos da rede EUSUMO da Xunta de Galicia asesoraron aos participantes na detección de necesidades e  ideas de negocio innovadoras e levaron a cabo casos prácticos, coa colaboración de FADEMUR (Federación de Asociación de Mulleres Rurais) e COGAMI.

A próxima xornada desenvolverase o vindeiro mércores, día 9, na que os asistentes recibirán formación sobre Fórmulas de autoemprego, nunha actividade na que colabora AEMPE, e téncicos do IGAPE informarán das axudas ao emprendemento.

A xestión das cooperativas será o último dos temas que se abordará nestas xornadas, tamén da man de técnicos da Rede EUSUMO.

Labor conxunta

A este obradoiros seguiranlle outros cinco que se desenvolverán nas comarcas de Arousa, Baixo Miño, Deza, Val Miñor e Condado-Paradanta, co obxectivo de impulsar o autoemprego así como formar e asesorar  aos emprendedores sobre diferentes aspectos, como os estudos de mercado, as axudas, a xestión de cooperativas ou as diferentes fórmulas de autoemprego reguladas en España e en Galicia.

Estas actividades forman parte do convenio do Pacto pola Calidade e a Productividade Social no Emprego, co que a Deputación, por medio do proxecto aQuelando3, pretende implicar aos axentes sociais e ás administracións supramunicipais no desenvolvemento do rural e dunha economía máis social.

Con este obxectivo, asinouse un convenio coas mancomunidades dos Vales Ulla-Umia, do Salnés, do Baixo Miño, de Terras do Deza e de Municipios  do Val Miñor, así como co Grupo de Desenvolvemento Rural Condado- Paradanta, Cruz Vermella Española, COGAMI, FADEMGA, Cáritas, Fundación Érguete, a Federación de Asociacións de Mulleres Rurais, a Asociación de Empresas de Inserción de Galicia), a Asociación de Jóvenes Empresarios (AJE); a Asociación de Empresarios de Mediana e Pequena Empresa(AEMPE) a Asociación Provincial de Autónomos de Pontevedra, a Asociación de Empresarias de Pontevedra, os sindicatos CC.OO e UXT e a Universidade de Vigo.

Creación de Servizos de proximidade

Ao abeiro deste convenio organízanse os obradoiros de autoemprego e outras accións encamiñadas a promover, por medio da acción conxunta, o emprego nos diferentes concellos da provincia, con especial incidencia na creación de servizos de proximidade.

Neste sentido, todas as organizacións implicadas participan na planificación dos obradoiros e das actividades que se desenvolven nos diferentes municipios, co obxectivo de adecuar as mesmas á situación e ás necesidades concretas de cada área.