TUI

O CEIP Nº1 DE TUI CONTA XA COA SÚA PROPIA COOPERATIVA ESCOLAR, NO MARCO DO PROGRAMA EMPRENDER NA MIÑA ESCOLA, QUE IMPULSA A DEPUTACIÓN

O luns recibirán a acreditación correspondente nun acto que se celebrará no propio centro escolar

·       Mister Shop elaborará diferentes produtos e poraos á venda, destinando parte dos beneficios a unha organización con fins sociais

O centro plurilingüe CEIP Nº 1 de Tui conta xa coa súa propia cooperativa escolar. Alumnos de sexto de primaria foron quen de constituírse en cooperativa despois de todo un proceso de traballo que están a desenvolver no marco do programa Emprender na Miña Escola, que promove a Deputación de Pontevedra coa colaboración da Consellería de Educación.

Este programa pretende desenvolver hábitos e comportamentos emprendedores entre o alumnado, facilitando a súa integración social de xeito mais eficaz e satisfactoria á vez que se favorece o desenvolvemento de competencia básicas como son a competencia en comunicación lingüística; matemática; no coñecemento e interacción co mundo físico; no tratamento da información; na relación e comportamento social e cidadá; cultural e artística, así como aprender a aprender e mellorar a autonomía e iniciativa persoal.

Constitución da cooperativa

Os 26 alumnos de sexto de primaria que participan no proxecto foron quen de reunirse e celebrar a asemblea constituinte onde se elixiron democraticamente os postos da xunta directiva, (presidente/a, secretario/a e tesoreiro/a). Ademais, tamén se organizaron os demais membros por distintos departamentos (mercadotecnia, calidade do produto, imaxe da cooperativa, relacións públicas… etc), tal e como estaba previsto no cronograma do proxecto.

Os membros da cooperativa, á que bautizaron como Mister Shop, aportaron o capital inicial e incorporaron nos seus estatutos a cláusula de responsabilidade  social onde indican que parte dos seu beneficios irán destinados a unha organización con fins sociais.

Despois de todo este traballo e de rexistrar os estatutos na Deputación de Pontevedra, os escolares recibirán o luns, nun acto que terá lugar no propio dentro, a Tarxeta de Inscrición como Cooperativa Escolar.

O acto terá lugar ás 10,00 horas e contará coa participación do deputado provincial e alcalde de Tui, Moisés Rodríguez; o Técnico do Proxecto Eme Cooperanova da Deputación de Pontevedra, Miguel Panette; así como persoal docente e de dirección do Colexio CEIP Nº 1 Plurilingüe de Tui e os membros da cooperativa “Mister Shop”.

Unha vez constituída formalmente, os membros da cooperativa crearán o seu produto e porano á venda, destinando parte dos beneficios a unha organización social.