PONTEVEDRA

As escolas deportivas de marcha contan con máis de 150 alumnos

A DEPUTACIÓN ENTREGA 18.000 EUROS Á FEDERACIÓN GALEGA DE ATLETISMO PARA DISTINTAS ACTIVIDADES DEPORTIVAS

A deputada Begoña Estévez reuniuse esta mañá co presidente da Federación Galega de Atletismo, Isidoro Hornillos, ao que lle fixo entrega de dúas resolucións polas que a Deputación lle concede apoio económico para o financiamento do Campionato Galego Absoluto de Atletismo e para as escolas deportivas de marcha atlética.

A achega da Deputación para estas dúas actividades ascende a un total de 18.000 euros, dos cales 16.000 corresponden ás escolas de marcha –hoxe fíxoselle entrega dos últimos 6.000, dado que 10.000 xa lle foran entregados anteriormente– e os 2.000 restantes para o campionato galego, que tivo lugar este verán en Pontevedra.

As escolas deportivas de marcha atlética están implantadas en catro concellos da provincia e contan con máis de 150 alumnos. Iniciaron o seu funcionamento en 2009 e, desde entón, o número de inscritos non parou de medrar, de forma que a día de hoxe preto de 500 nenos e nenas participaron nestas actividades, que agora botan de novo a andar para o curso 2013-2014.