PONTEVEDRA

LOUZÁN E BAS ASINAN O CONVENIO DE COLABORACIÓN QUE POSIBILITARÁ A INSTALACIÓN DE HERBA SINTÉTICA NO COMPLEXO DEPORTIVO DE SANTA MARIÑA EN REDONDELA

O presidente da Deputación, Rafael Louzán, asinará esta tarde un convenio de colaboración co alcalde de Redondela, Javier Bas Corugeira que posibilitará levar a cabo as obras do proxecto de “Infraestrutura básica necesaria para a posterior instalación de herba sintética no complexo deportivo de Santa Mariña”.

Os investimento necesario para a realización das mencionadas obras serán financiados pola Deputación de Pontevedra por un importe de 240.000 euros.

O concello dispón dunha partida de 299.939,12 euros para a adquisición de herba sintética, mediante unha subvención concedida a través dos fondos europeos, tendo aberto xa o proceso de contratación correspondente para a súa adquisición, pero non dispón de medios económicos para levar a cabo as obras de infraestrutura básica para a súa instalación que se cifran en 240.000,00 euros. De aí que solicite a axuda da Institución Provincial.

O  Concello de Redondela é titular das instalacións deportivas de Santa Mariña que presentan unha serie de deficiencias que impiden a súa utilización de xeito normal, necesitando unha profunda remodelación, tanto no terreo de xogo como nos elementos complementarios.

A Deputación asumirá a licitación, dirección, execución e recepción das obras contempladas no proxecto técnico.  O Concello de Redondela, pola súa banda, porá a disposición da Deputación os terreos necesarios para poder levar a cabo as obras , así como de obter a correspondente licenza municipal. Tamén levará a cabo ó mantemento da infraestrutura trala recepción de obras.