PONTEVEDRA

A DEPUTACIÓN REPARTIRÁ ENTRE OS CLUBS DE FÚTBOL DA PROVINCIA AS INVITACIÓNS PARA VER O ADESTRAMENTO DA SELECCIÓN ESPAÑOLA EN PASARÓN O DÍA 6 DE SETEMBRO

Rafael Louzán: “Será un premio para os xogadores, adestradores, directivos e para todas aquelas persoas que traballan desinteresadamente  para que se conteña a base do fútbol na nosa provincia”.

·       A Deputación convocará ós clubs para coordinar o transporte.

·       Os nenos e mozos pasarán unha xornada completa en Pontevedra para visitar o museo itinerante da Selección e as copas de Europa e do Mundo conquistadas por España.

A Deputación de Pontevedra repartirá entre os 250 clubs de fútbol existentes na provincia as invitacións que posibilitarán acudir ó estadio de Pasarón para ver o adestramento da Selección Española de Fútbol o 6 de setembro, un día antes do partido internacional amizoso España -Arabia Saudí.

Así o anunciou hoxe o presidente da Deputación Provincial, Rafael Louzán, quen considerou que esta iniciativa “será unha oportunidade marabillosa e ilusionante para os rapaces e mozos das distintas localidades e municipios que compoñen a base do fútbol pontevedrés”.  O titular da institución engadiu, ademais, que a Deputación como institución profundamente implicada coa canteira do balompé busca que esta oportunidade “sirva de acicate e contribúa a impulsar aínda máis o traballo destes novos deportistas”.

Premio ós nenos e ós que traballan para manter a base

“Será un premio para os xogadores, para  os adestradores, para os directivos e para todas aquelas persoas que traballan desinteresadamente para que se conteña a base do fútbol na nosa provincia e que perden do seu tempo libre para que os rapaces sexan felices e realicen unha actividade sana”, aseverou Louzán.

O máximo responsable da Deputación explicou que se vai organizar unha xornada completa na que os rapaces de todas as categorías do fútbol e de distintas localidades da provincia, ademais de ver o adestramento, van a poder visitar as instalacións que o Club Selección vai a instalar na Avenida de Montero Ríos. Así, poderán ver e fotografarse coa dúas copas de Europa e coa copa do Mundo conquistada por España; visitar o museo itinerante da selección e disfrutar dun percorrido con máis de 100 anos de historia do fútbol; e participar de diversas actividades lúdicas que se van a celebrar neste espazo.

Xuntanza de coordinación cos clubs

Con preto de 250 clubs de fútbol e arredor de 17.000 fichas federativas, Pontevedra constitúe actualmente a provincia galega con maior número de equipos e futbolistas, informou Louzán. Os responsables dos clubs serán convocados os vindeiros días a unha reunión na que se lles explicará o sistema de reparto das invitacións que será equitativo e transparente. Nesta xuntanza, comentou Louzán, tamén se abordará a organización do transporte para trasladar ós nenos e rapaces dende as distintas localidades”.

O encontro que enfrontará á Selección Española de Fútbol e a Arabia Saudí, nun partido internacional amizoso, terá lugar en Pasarón o vindeiro día 7 de setembro ás 22:00 horas. Será a terceira vez que a selección se mida a Arabia Saudí, con dúas vitorias nos encontros precedentes por 1-0 e 2-1. Pola súa banda, os adestramentos previos terán lugar o día 6 de setembro a unha hora que aínda está por determinar.

A Deputación de Pontevedra é unha das institucións máis implicadas no fomento da base do fútbol da provincia de Pontevedra. Así, ademais dun plan específico que se está a levar a cabo nos últimos anos para dotar de céspede artificial de última xeración a 70 campos de fútbol da provincia, tamén habilita distintas liñas de axudas para o deporte base; para a compra de material; establece convenios coas entidades; e organiza distintos eventos deportivos na provincia de Pontevedra.