O ROSAL

FEIRA DE SAN GREGORIO, EN PÍAS (SAN MIGUEL)

- Será este sábado día 13 e o domingo día 14 de marzo

Infogauda / O Rosal

Pías celebrará os días 13 e 14 de marzo, a tradicional Feira de San Gregorio, santo avogado da testa e do bandullo, con capela adicada a súa advocación preto da Estrada, neste lugar da parroquia de San Miguel.

Programa
O sábado, día 13, o grupo de gaitas A Boalleira percorrerá as rúas de Pías anunciando o comezo das festas.
Ás cinco da tarde actuación para os nenos e tamén para os maiores, de “O Xou do Paiaso Tururú” e o “Mago Yuri Cardinali”, e se o tempo o permite - que o permitirá -, haberá unha sorpresa para todos que chegará polo aire.
Nesta xornada terá lugar a apertura da cantina con degustación de viños das adegas do Rosal, acompañados de queixo, chourizos, empanadas e a venda da tradicional Rosca de Roxóns na súa XIII edición.
Amenizará esta xornada de feira a charanga “Os da Orde”.
O domingo, día 14, durante toda a xornada poderá degustarse polbo á feira, que coa súa coñecida mestría estará a cárrego dun polbeiro de Carballiño.

O longo da mañá haberá un pasarrúas do grupo de gaitas A Boalleira.
A partires das seis da tarde actuará o grupo guardés “Lareira”, e ás sete e media subirán o escenario o popular dúo de humoristas rosaleiros Os Campelos, co seu particular “Show dos Campelos”.

Actos culturais
Entre os actos culturais programados para os mencionados días, figuran varias exposicións, como “O deporte de equipo no Rosal”, con material fotográfico e documental. Outra das mostras é a exposición de Encaixe de palillos, con palillada incluída. Tamén haberá, un ano máis, unha exposición e venda de antigüidades, así como unha mostra de pintura da artista guardesa Charo Trigo Vicente, e tamén a V Feira de Artesanía.

Actos relixiosos
A capela de San Gregorio acollerá as principais celebracións relixiosas na honra do santo padroeiro. O día 14, domingo, ás 12 do mediodía, solemne Eucaristía con sermón e procesión, na que tamén participará o grupo de gaitas A Boalleira.