A GUARDA

A Guarda prepárase para converterse na capital nacional da filatelia con FILATEM 2026  

• A vila acollerá do 8 ao 12 de outubro a Exposición Nacional de Filatelia Temática, que reunirá coleccións de todo o país e incorporará por primeira vez unha sección xuvenil con 18 coleccións  

Ricardo Rodríguez Vicente/A Guarda

 A Guarda converterase esta semana nun punto de encontro para os amantes da filatelia coa celebración de FILATEM 2026, a Exposición Nacional de Filatelia Temática, que se desenvolverá do 8 ao 12 de outubro na Casa dos Alonso.  

 A cita reunirá na vila coleccións procedentes de distintos puntos de España e permitirá achegar ao público unha disciplina na que os selos deixan de ser simplemente elementos postais para converterse en pequenas pezas capaces de contar historias, divulgar coñecementos e percorrer diferentes ámbitos da cultura, da ciencia ou da sociedade.

 Un dos principais atractivos desta edición será a incorporación dunha sección xuvenil, na que participarán 18 coleccións. A presenza das novas xeracións pretende poñer o foco no futuro da filatelia e achegar esta afección aos máis novos, nunha aposta pola divulgación e pola renovación dun mundo no que cada selo pode ser tamén unha xanela á historia.  

 A exposición poderá visitarse na Casa dos Alonso durante as cinco xornadas de FILATEM, en horario de 10:00 a 13:00 horas e de 16:00 a 20:00 horas.  

 O programa oficial arrancará o xoves, 8 de outubro. Ás 12:00 horas terá lugar a inauguración de FILATEM 2026 e, unha hora máis tarde, ás 13:00, presentarase o selo de FILATEM, que nesta ocasión terá como protagonista a praza do Reló, un dos espazos máis recoñecibles do patrimonio guardés.

 A programación continuará o sábado 10, ás 12:00 horas, coa presentación do “Tu Sello” e do cuño conmemorativo dedicado a Celso García de la Riega, engadindo así novos elementos de interese para os coleccionistas e para aquelas persoas que se acheguen por primeira vez ao mundo da filatelia.  

 O domingo, 11 concentrará tamén dúas das actividades máis destacadas. Ás 11:30 horas celebrarase a mesa redonda “Como mellorar a nosa colección de Filatelia Temática a través da folla de cualificación”, unha oportunidade para coñecer de maneira práctica os criterios de valoración das coleccións e afondar nas claves para melloralas.  

 Xa pola tarde, ás 18:00 horas, terá lugar un dos momentos máis solemnes do programa: a entrega da Medalla de Ouro ao Mérito Filatélico de FEGASOFI a José Ángel Gándara Rodríguez, como recoñecemento á súa traxectoria e á súa contribución ao ámbito filatélico.

 FILATEM 2026 terá, ademais, unha importante vertente educativa. Ao longo da xornada do venres, os centros educativos da contorna achegaranse á Casa dos Alonso para descubrir o mundo da filatelia e coñecer de primeira man as coleccións expostas. A iniciativa busca que os escolares descubran o valor cultural e histórico dos selos e, ao mesmo tempo, que teñan un primeiro contacto cunha afección que pode servir como ferramenta para aprender e investigar sobre múltiples temas.  

 Durante cinco días, A Guarda será así escaparate da filatelia temática nacional, combinando exposición, coleccionismo, divulgación, actividade educativa e recoñecemento á traxectoria de figuras vinculadas a este ámbito.  

 FILATEM 2026 preséntase, en definitiva, como unha oportunidade para que tanto os coleccionistas e especialistas como o público xeral se acheguen a unha disciplina na que cada selo ten algo que contar. E este ano, ademais, con especial atención ás novas xeracións, chamadas a tomar o relevo e manter viva unha afección que segue atopando novas historias en cada pequena peza de papel.