Galicia e o Norte de Portugal reforzan a cooperación transfronteiriza a través dos seus AECT
Ricardo Rodríguez Vicente/O Baixo Miño
A cooperación entre Galicia e o Norte de Portugal continúa a sumar espazos de encontro e novas vías de colaboración. O AECT da Eurorrexión Galicia-Norte de Portugal mantivo unha reunión co AECT Rio Minho coa mirada posta en identificar novas oportunidades de traballo conxunto e seguir avanzando na integración dun territorio que comparte moito máis ca unha fronteira.
O encontro serviu para reafirmar o compromiso común co fortalecemento da cooperación transfronteiriza e coa procura de respostas compartidas aos retos e ás oportunidades que se presentan a ambos lados do río Miño. Unha vontade de colaboración que parte dunha realidade compartida: unha historia común, unha identidade próxima e un espazo de vida no que as relacións económicas, sociais e culturais transcenden as fronteiras administrativas.
Durante a reunión, ambas as entidades analizaron posibles novas áreas de colaboración e a necesidade de seguir mellorando a coordinación entre as institucións que traballan no territorio transfronteirizo. A articulación institucional aparece así como unha ferramenta esencial para aproveitar recursos, xerar novas oportunidades e ofrecer respostas máis eficaces ás necesidades da cidadanía.
O fortalecemento destes vínculos contribúe, ademais, a avanzar na construción dunha Eurorrexión máis integrada, capaz de poñer en valor o potencial dun territorio que ten na cooperación unha das súas principais fortalezas.
A aposta compartida pasa, polo tanto, por seguir derrubando barreiras e multiplicando as posibilidades de colaboración. Máis cooperación institucional para afrontar os desafíos comúns; máis capacidade de resposta para o territorio; e máis oportunidades para unha Eurorrexión que entende a fronteira non como un límite, senón como un espazo de encontro e de futuro compartido.
Ningún comentario:
Publicar un comentario