CULTURA

Do Lusco ó Fusco leva A Guarda e o folclore galego ata Bulgaria  

•  O grupo guardés participa no Festival Internacional de Nedelino, un encontro internacional que reúne formacións de máis dunha ducia de países 

Integrantes do grupo Do Lusco ó Fusco que participarán no Festival Internacional de Nedelino (Bulgaria)

Foto: Cedida 

Ricardo Rodríguez Vicente/A Guarda

 Hai viaxes que van moito máis alá de percorrer quilómetros. A que iniciou onte o grupo Do Lusco ó Fusco dende A Guarda ten como destino Smolyan, en Bulgaria, pero tamén leva consigo unha parte da identidade e da cultura da vila do Baixo Miño e de toda Galicia.  

 A formación guardesa puxo rumbo a Bulgaria para participar no Festival Internacional de Nedelino, un importante encontro internacional no que compartirá escenario con agrupacións procedentes de países como India, Corea do Sur, Romanía, Macedonia do Norte, Grecia, Marrocos, Xeorxia, Rusia, Turquía, Polonia, Montenegro e Serbia.  

 Nun escenario no que se darán cita diferentes tradicións, músicas e formas de entender o folclore, Do Lusco ó Fusco será a encargada de poñer o acento galego. Unha oportunidade para amosar, lonxe da casa, a riqueza da música e das danzas tradicionais de Galicia e, ao mesmo tempo, para coñecer outras culturas e compartir experiencias con formacións chegadas de diferentes recunchos do mundo.

 Non é, con todo, a primeira vez que o grupo gardés exerce como auténtico embaixador cultural. Desde hai décadas, Do Lusco ó Fusco leva difundindo o folclore galego e o nome da Guarda por diferentes puntos de Galicia, do territorio nacional e tamén fóra das nosas fronteiras. Cada actuación convértese así nunha pequena viaxe de ida e volta: Galicia viaxa con eles e, ao seu regreso, novas músicas, costumes e amizades enriquecen tamén a vida cultural da vila.  

 Ese espírito de intercambio cultural está moi presente na propia actividade do grupo na Guarda. Grazas ao seu labor, cada ano a vila pode achegarse a outras tradicións a través do Encontro dos Pobos, unha cita que transforma as rúas e espazos guardeses nun punto de encontro entre culturas. Na pasada edición, por exemplo, foi posible gozar das actuacións das formacións romanesas Doina Ilfovului e Vatra Buftei.  

 Agora é Do Lusco ó Fusco quen colle a maleta e viaxa cara a Bulgaria. Alí, entre músicas e danzas de diferentes países, a formación levará consigo o son dunha terra pequena en tamaño, pero cunha enorme riqueza cultural.

 Porque cada paso de baile, cada melodía e cada traxe tradicional que atravesa unha fronteira é tamén unha maneira de dicir de onde vimos. E nesta ocasión, desde A Guarda ata Nedelino, Galicia volverá bailar no mundo da man de Do Lusco ó Fusco.