BALONMÁN FEMININO
O Atlético Guardés estrea a súa pretemporada cunha vitoria ante o Porriño (24-21)
• O equipo baixomiñoto inaugurou a súa nova singradura con grandes sensacións ante o rival louriñés no II Memorial por Juan Rodríguez
• As 16 convocadas sumaron minutos e permitiron a José Ignacio Prades probar todas as rodaduras para a nova tempada
• O Summer Bag de Villacelama é a próxima parada para as guardesas, xogando a primeira das dúas xornadas ante o Aula Valladolid
.jpg)
Fotos: CBAG
.jpg)
Redacción Deportes/A Guarda
O novo Atlético Guardés iniciou este sábado, 8 de agosto, en plenas Festas del Monte Santa Trega, a súa singradura cunha vitoria de carácter ante o Conservas Orbe Zendal Balonmano Porriño.
As 16 convocadas sumaron minutos nun partido de grandes sensacións, incluídas as tres xuvenís que xogan a pretemporada como reforzos: Sabela Lomba, Silvia Lomba e Melina Rodríguez. O choque estivo igualado en practicamente todo momento ata o seu epílogo, cunha primeira parte moi marcada por unha gran defensa local pero co ataque louriñés marcando mínimas diferenzas.
As de Prades fóronse ao descanso liderando (11-10, min. 30), apuntando unha melloría segundo pasaban os minutos. Aínda que non deixou de loitar o outro galego, co tira e afrouxa de rendas mínimas sen cesar, nos minutos finais as rodas da Sangriña engraxáronse por completo para dar ao anfitrión o impulso que necesitaba para afianzarse cara á vitoria. Un pavillón baixomiñoto con notable afluencia nestas datas sinaladas celebraba o primeiro triunfo dun proxecto que bota a andar a pesar das dificultades fóra das pistas (24-21, final).
Esta vitoria debut coincide co memorial do segundo aniversario do falecemento de Juan Rodríguez Pérez, expresidente de honra do Club. Antes de comezar o encontro entregouse un recoñecemento á súa viúva, Gloria Pacheco Cardoso, honrando a memoria dunha das persoas fundamentais na historia recente da entidade.
Ningún comentario:
Publicar un comentario