TUI

O PP DE TUI PROPÓN UNHA BAIXADA DO 25% NO IMPOSTO DE OBRAS PARA FAVORECER A CONSTRUCIÓN E REHABILITACIÓN DE VIVENDAS E EVITAR A DESVANTAXE COS CONCELLOS DA CONTORNA 

 Os populares presentan unha moción para que o tipo impositivo baixe do 4% ao 3% do orzamento de execución material, posto que hai unha fiscalidade excesiva nas casas unifamiliares de ata 15.000 euros 

 A formación liderada por Nico Montes tamén cursa outra proposta para reclamar unha auditoría externa do departamento de Urbanismo ante os importantes retrasos na tramitación das licenzas 

Nico Montes, voceiro do grupo municipal do PP de Tui

Foto: GMPP

Infogauda/Tui

 O grupo municipal do PP de Tui vén de presentar unha proposta de baixada do 25% no Imposto de Construcións, Instalacións e Obras (ICIO) co obxectivo de favorecer a construción e rehabilitación de vivendas e o desenvolvemento doutros proxectos urbanísticos e para corrixir a importante desvantaxe competitiva que sufren os veciños en comparación cos dos demais concellos da contorna, que teñen unha fiscalidade moito máis asequible. 

 Así, os populares, que formalizaron esta medida a través dunha moción que se debaterá no pleno do xoves, solicitan que o tipo impositivo do ICIO se reduza do 4% ao 3% do orzamento de execución material para favorecer a dinamización económica, a rexeneración urbana, o fomento do investimento produtivo e o acceso á vivenda nun momento no que é a principal necesidade e demanda da cidadanía. 

 O PP tudense indicou que a situación fiscal deste imposto “está a xerar unha importante preocupación” entre técnicos, promotores e veciños que constrúen ou reforman as súas propias casas, posto que teñen que tributar, en termo medio, entre 10.000 e 15.000 euros polas obras, mentres que nos municipios veciños rolda os 6.000 euros. Neste senso, concretaron que, mentres o tributo de Tui está fixado no 4%, en municipios como O Porriño ou Gondomar sitúase no 2,2% e o 2%, respectivamente. 

 O voceiro municipal, Nico Montes, lembrou que esta medida é “moi necesaria” non só para corrixir as importantes diferenzas fiscais cos demais concellos, senón tamén para axudar ás familias e promotores tras o forte aumento de custes dos seis últimos anos: “Entre unhas cousas e outras facer ou rehabilitar unha casa en Tui estase a facer imposible, polo que cremos que esta rebaixa fiscal compensaría parcialmente o aumento dos prezos e melloraría a viabilidade económica dos proxectos a prol da xente”. 

 Por outra banda, o PP de Tui tamén levará a pleno outra proposta para a realización dunha auditoría externa e independente do Departamento de Urbanismo para analizar as operacións e procesos, a organización interna e a provisión de recursos materiais e persoais, así como os tempos de resolución co fin de desenvolver un plan de accións corretoras, posto que o actual funcionamento é susceptible de melloras. 

 Neste senso, os populares tudenses revelaron que Urbanismo leva tempo a experimentar continuos retrasos na tramitación das licenzas de obras, co conseguinte prexuízo para veciños, emprendedores e promotores, e ocasiona un efecto directo de paralización ou ralentización de proxectos residenciais ou empresariais que deberían desenvolverse con maior axilidade.