A GUARDA

"CARRERO CARECE DUN PLAN DE USOS E DUN INFORME ECONÓMICO QUE AMPARE A COMPRA DA CASA DE D. ELOI"  

• O BNG  propón destinar os fondos solicitados á Deputación para a compra da  casa nas necesidades urxentes que ten A Guarda, e convoca á veciñanza ao próximo pleno do 27 de maio 

O portavoz nacionalista, Anxo Lois Baz Vicente, nun momento do pleno extraordinario celebrado na mañá de onte mércores, na Casa do Concello

Foto:BNG

Infogauda/A Guarda

 Na mañá deste xoves, 21 de maio, o Grupo municipal do Bloque Nacionalista Galego, na corporación municipal guardesa, fixo público que "no pleno celebrado onte no concello da Guarda a instancia do BNG, púxose de manifesto que o alcalde e o seu goberno carecen dun plan de usos e dun informe económico-financieiro  que ampare  a  viabilidade  da compra da casa de D. Eloi".  

 O portavoz nacionalista, Anxo Lois Baz Vicente, acusou ao alcalde de xestionar o municipio a base de "ocorrencias" e esixiu rigor ante unha operación de tal magnitude. "Calquera institución seria, antes de afrontar unha compra millonaria, encargaría un informe económico-financeiro que aclarase a súa viabilidade  e presentaría un plan de usos. O contrario é xogar  cos cartos dos guardeses", criticou Baz, quen lembrou o recente gasto de 40.000 euros nuns terreos inútiles para o punto limpo.  

 Pola súa parte, Bea Lomba, portavoz do BNG para asuntos económicos, alertou sobre o impacto que esta operación terá nas arcas municipais, nun exercicio onde o orzamento municipal só conta con 34.000 euros para investimentos. "É unha temeridade meter ao Concello nesta compra. Sen os fondos do Plan+Provincia que se pretenden dilapidar na casa, o municipio quedará paralizado e sen marxe para facer obras, mantemento ou mellora de servizos básicos", advertiu Lomba. 

 Ante esta situación, o BNG anunciou "que presentará unha proposta formal no vindeiro pleno ordinario, que terá lugar o mércores 27 de maio ás 20:00 horas. A iniciativa solicitará a retirada da petición de axuda á Deputación de Pontevedra para a compra do inmoble co obxectivo de reorientar eses cartos cara a necesidades urxentes en espazos públicos e servizos". Desde a organización nacionalista fan "un chamamento explícito á veciñanza para que asista á sesión e esixa ao alcalde dar marcha atrás nesta operación".