TUI / VALENÇA DO MINHO

Tui e Valença do Minho celebran 140 anos de unión e cooperación no aniversario da ponte internacional 

• Os mandatarios da dúas cidades realizaron unha solta simbólica de 250 pombas

O alcalde de Tui, Enrique Cabaleiro González, e o presidente da Cámara de Valença do Minho, José Manuel Vaz Carpinteira, xunto a membros das corporacións municipais, no acto de conmemoración do 140 aniversario da ponte internacional

Foto: C.T.

Infogauda / Tui / Valença do Minho

   Tui e Valença celebraron hoxe o 140 aniversario da ponte internacional que une os dous municipios, e que dende hai máis dun século é símbolo de cooperación entre unha e outra beira do Miño.  

 O alcalde de Tui, Enrique Cabaleiro González, e o presidente da Cámara de Valença do Minho, José Manuel Vaz Carpinteira, xunto a membros das corporacións municipais, realizaron a solta simbólica de 250 pombas, e ambos coincidiron en sinalar como esta Ponte, obra do arquitecto Pelayo Mancebo, é moito máis que unha infraestrutura que comunica dous países, xa que simboliza á perfección os valores europeos de cooperación, liberdade e fraternidade.  

 Así o explicaba Enrique Cabaleiro, alcalde de Tui, afirmando que a ponte “simboliza a unión que historicamente houbo entre os dous pobos e simboliza os valores e os principios sobre os que se asenta a convivencia e o marco democrático que nos deron aos cidadáns no marco da Unión Europea”. Afirmaba que en momentos complexos como os que estamos a vivir  “máis que nunca son necesarios estes actos que simbolizan esa fraternidade que debe existir entre os pobos”.  

 No mesmo senso o presidente da Cámara de Valença do Minho, José Manuel Vaz, sinalou que o desta mañá foi “un acto simbólico para testemuñar a nosa forza e vontade de colaborar cada vez máis”. Aquí se simboliza o que a Unión Europea defende de fraternidade, liberdade e cooperación entre os pobos”.