O ROSAL

O Rosal amplía o prazo de solicitude para participar no desfile de Entroido   

•  Tras o cambio de data, o Concello abre ata o martes 24 ás 14.00 horas o prazo de inscrición  

Imaxe dun momento dunha edición anterior do tradicional desfile de Entroido

Foto: C.O.R.

 

Infogauda / O Rosal  

 Tras o aprazamento do desfile de Entroido por mor do mal tempo ao vindeiro 1 de marzo, o Concello do Rosal decidiu ampliar o prazo de presentación de solicitudes para facilitar a participación de todas aquelas persoas e colectivos que non a tramitaran por non poder asistir na data inicial. 

 Desde hoxe e ata o martes 24 de febreiro ás 14.00 horas, abrirase un novo período de inscrición co obxectivo de dar cabida a novos participantes, mantendo en todo momento o dereito de participación de todas as persoas e grupos que xa estaban previamente inscritos. 

 A alcaldesa do Rosal, Ánxela Fernández Callís, subliña que “queremos que ninguén quede fóra por mor do cambio de data. O Entroido é unha festa colectiva, feita pola veciñanza e para a veciñanza, e por iso ampliamos o prazo para garantir a máxima participación”. A rexedora destaca que “a resposta está sendo moi positiva e agardamos volver superar as expectativas cun desfile multitudinario e cheo de creatividade”. 

 Está previsto que máis de 1.100 persoas participen no tradicional desfile, que dará comezo ás 11.00 horas desde a Rotonda da Feira e percorrerá as rúas Xulio Sesto e Ramón Franco ata o cruce coa Lomba, enchendo o Rosal de cor, música e ambiente festivo. 

 Desde o Concello anímase a asociacións, comparsas, grupos e participantes individuais a aproveitar esta ampliación do prazo para sumarse a unha das citas máis agardadas do calendario festivo local. O 1 de marzo, o Rosal volverá saír á rúa para celebrar un Entroido participativo, diverso e cheo de enerxía.