Brais González Durán, novo director da Banda de Música Mougás / Baiona
Dámoslle a benvida ao noso novo director: Brais González Durán
É unha enorme satisfacción presentarvos a Brais González Durán, que se incorpora como novo director, achegando ilusión, talento e unha sólida formación musical.
A súa historia coa música comezou moi cedo: con oito anos iniciou a súa formación, e aos once entrou a formar parte da Unión Musical de Mougás e da Banda Municipal de Baiona, baixo a dirección do noso antigo director Gabriel Rodríguez Rodríguez. Desde entón, a música e a banda forman parte inseparable da súa vida.
Brais é natural de Mougás, profundamente arraigado á tradición musical do noso pobo. Toda a súa familia forma parte da Unión Musical de Mougás, e este mesmo ano o seu avó cumpre 69 anos na banda, un exemplo vivo de dedicación e continuidade xeracional.
A súa carreira musical divídese en dúas etapas clave: realizou o Grao Profesional no Conservatorio de Vigo e completou o Grao Superior no Conservatorio de Asturias, na especialidade de trompeta. Ademais, conta cunha ampla experiencia docente e interpretativa, formando parte da Banda de Música Cidade de Oviedo e da Orquestra Oviedo Filarmonía (OFIL) como reforzo de trompeta e corneta.
Desde fai anos, compaxina a súa actividade artística coa docencia en linguaxe musical e vento metal, impartindo clases tanto en Galicia como en Asturias. Ademais, xa realizou formación especializada en dirección, o que lle permite afrontar este novo reto cunha combinación perfecta de xuventude, ganas, compromiso e unha forte implicación coa banda.
Comezamos así unha etapa de cambios, novidades e ilusión compartida, mantendo vivas as nosas raíces e mirando ao futuro.
Benvido, Brais. É un orgullo iniciar este novo camiño contigo!
Ningún comentario:
Publicar un comentario