TUI

López Campos pon en valor a catedral de Tui como “unha das xoias do noso patrimonio cultural” 

• Destaca que se trata “dun dos bens nos que actuamos desde a Xunta, ao abeiro do Plan Catedrais, para mantelo nas mellores condicións de conservación”

• O conselleiro de Cultura, Lingua e Xuventude participou no acto institucional que abre a programación do 800 aniversario da consagración do templo  

O conselleiro de Cultura, Lingua e Xuventude participou no acto institucional que abre a programación do 800 aniversario da consagración do templo  

Foto: X.G.

Infogauda / Tui

 O conselleiro de Cultura, Lingua e Xuventude, José López Campos, participou hoxe no acto institucional que abre a programación do 800 aniversario da consagración da catedral de Tui, onde manifestou que “ademais de ser un símbolo relixioso, é tamén unha das xoias do patrimonio cultural galego”. Como tal, puntualizou, “trátase dun dos grandes templos nos que actuamos desde a Xunta ao abeiro do Plan Catedrais para mantelos nas mellores condicións de conservación”.  

 O representante do Goberno galego lembrou, con motivo desta efeméride, que está en proceso de licitación o proxecto de execución da museografía e montaxe expositiva para a posta en marcha de cara ao ano que vén do Museo Catedralicio Diocesano de Tui, cun orzamento de 640.000€. Neste senso, fixo fincapé “no compromiso con poñer en valor os nosos bens impulsando espazos con carácter divulgativo, como é neste caso este museo”, puntualizando “que permitirá comprender mellor este conxunto catedralicio como un referente histórico, relixioso, patrimonial e turístico tanto a nivel local como de toda Galicia”.  

 Así, cómpre destacar que o proxecto en licitación inclúe tarefas de subministración e  traballos de fabricación, montaxe e instalación dos elementos museográficos da exposición que albergará o espazo, así como a realización de material audiovisual. Concretamente, trátase de dotalo co mobiliario axeitado, con sistemas de iluminación, da elaboración de maquetas e recreacións, sinais de orientación, equipos de son ou paneis interpretativos, entre outros traballos.  

 A actuación está cofinanciada nun 60% polo Fondo Europeo de Desenvolvemento Rexional, no marco do Programa Galicia FEDER 2021-2027, que ten entre os seus obxectivos a protección, o desenvolvemento e a promoción do patrimonio e servizos culturais.