A GUARDA

A Asociación Almirante de la Mar Oceánica, de A Guarda presentouse en sociedade

• Cunha conferencia de Luis Pose Regueiro, que presentou seu libro “Cristóbal Colón: primer evangelizador de América” 

Momento no que Luis Pose Regueiro recibiu de mans do alcalde A Guarda, un pequeno agasallo, como agradecemento a súa achega cultural

Fotos: Infogauda

Vista do salón de plenos do Concello de A Guarda que acolleu a conferencia-coloquio

Ricardo Rodríguez Vicente / A Guarda

 Na noitiña de onte, venres 28 de novembro de 2025, o salón de plenos da Casa do Concello de A Guarda acolleu unha conferencia-coloquio de Luis Pose Regueiro (Nigrán, 3 de xaneiro de 1979), sacerdote da diocese Tui-Vigo, profesor de Historia de Igrexa, investigador e autor do libro "Cristóbal Colón: primer evangelizador de América". 

 Editado por Universo de las Letras, no devandito libro, Luis Pose Regueiro recolle a súa tese de licenciatura en Historia da Igrexa, pola Universidade Pontificia Gregoriana de Roma, defendida en xuño de 2020. 

 O acto - organizado pola Asociación Almirante de la Mar Oceánica, coa colaboración do Concello - contou coa asistencia do alcalde de A Guarda, Roberto José Álvarez Carrero; do concelleiro de Cultura e Deportes, Celso Rodríguez Fariñas; e do presidente da Asociación Almirante de la Mar Oceánica, de A Guarda, José Ángel Gándara Rodríguez, así como persoas chegadas dende concellos do Val Miñor e do Baixo Miño, e unha representación da veciñanza de A Guarda.

 Logo dunha breve intervención de Celso Rodríguez Fariñas a xeito de salutación ao autor do libro antes mencionado, fixo uso da palabra, José Ángel Gándara Rodríguez, quen efectuou unha reseña biográfica de Luis Pose Regueiro.

 Deseguido interviu o alcalde Roberto José Álvarez Carrero, quen salientou os vencellos de amizade que dende fai anos ten con Luis Pose. 

 A continuación, fixo uso da palabra Luis Pose Regueiro, que focalizou a primeira parte da súa intervención no obxectivo da expedición liderada por Cristóbal Colón, que tiña unha motivación fundamentalmente relixiosa. E nesa perspectiva, o relator foi tecendo os fíos argumentais da súa investigación, baseándose nos contidos de diversos documentos históricos aos cales tivo acceso no proceso de redacción da súa tese de licenciatura, así como na preparación da tese de doutoramento que agarda ter rematada próximamente.

 Asemade, afirmou que Cristóbal Colón baseouse no mapa de Henricus Martellus para planificar o seu roteiro cara ás Indias, un mapa que representaba a xeografía coñecida da época e subestimaba drasticamente o tamaño do planeta, pois non reflectía continente algún en dirección oeste, agás algunhas illas. 

 Ese mapa, do mesmo xeito que as ideas doutros, como o matemático florentino Paolo dal Pozzo Toscanelli, subestimaba a distancia entre Europa e Asia, o que alentou o proxecto de Colón de chegar ás Indias navegando cara ao oeste.

 Luis Pose falou tamén do relato evanxelizador da expedición de Colón, salientando que o almirante respectaba aos nativos do novo continente, e non era partidario de que fosen bautizados por imposición.

 Na segunda parte da súa conferencia, o investigador referiuse as posibles orixes de Cristóbal Colón, pondo en cuestión a teoría xenovesa, que ao longo de moitos anos foi a predominante. Iso non quer decir que fose á correcta, como logo Luis Pose foi debullando e argumentando. 

 Asemade relembrou que Colón presentou en 1484 o seu proxecto de viaxe a Asia polo oeste, primeiro ao rei Juan II de Portugal, pero o monarca rexeitouno. A negativa deste debeuse á avaliación do seu proxecto por unha xunta consultiva, as ambiciosas demandas de Colón e a crenza portuguesa no roteiro africano, xa que nese momento estaba enfocado en atopar un roteiro cara ás Indias bordeando África. Despois do rexeitamento, Colón dirixiuse a España en busca de financiamento dos Reis Católicos. 

 O relator fixo fincapé en que Cristóbal Colón escribía no castelán daquela época, e que existen topónimos indicados por el, que teñen unha relación directa coa súa mais que probable orixe galega, situando como posible ubicación do seu berce en San Salvador de Poio (Pontevedra).

 Asemade, ao igual que o escritor, historiador e poeta Celso García de la Riega (Pontevedra, 26 de agosto de 1844 - 3 de febreiro de 1914), cuxas investigacións indican que Cristóbal Colón era natural de Poio; Luis Pose referiu diversos datos que indican que Pedro Álvarez de Soutomaior (Pedro Madruga), puido ser o protagonista do encontro entre dous mundos. 

 Ese relato centrou maioritariamente a súa intervención, poñendo negro sobre branco, datos concluíntes respecto a identidade galega de Cristóbal Colón.

 Finalmente, a instancia de Luis Pose, varias persoas plantexaron diversas preguntas que foron abordadas e atendidas polo investigador, que dito sexa de paso, en ningún momento fixo campaña a prol do seu libro  "Cristóbal Colón: primer evangelizador de América", que está á venda nas librerías.

 Antes de rematar o acto, o alcalde Roberto José Álvarez Carrero, en nome do Concello de A Guarda, fíxolle entrega a Luis Pose Regueiro, dun pequeno agasallo, en agradecemento a súa achega cultural.  

Asociación “Almirante da Mar  Oceánica”   

 A asociación, sin ánimo de lucro, “Almirante da Mar Oceánica” foi fundada o 15 de agosto de 2024, co fin de divulgar a figura de Cristóbal Colón, a súa relación co mar e a súa orixe. 

 Para levar a cabo os seus fins a asociación pretende organizar charlas sobre a súa orixe; elaboración de artigos; presentación de libros de temática mariña; e a creación dunha biblioteca relacionada ca figura do descubridor de América. 

 A sua xunta directiva está composta por: José Ángel Gándara Rodríguez, presidente;  Antonio Cid Vázquez, vicepresidente;  Joaquín Cadilla Castro, secretario; Francisco José Portela Baz, tesoureiro;  Ramón González  González, vogal; e Víctor Álvarez Coballes, vogal.