TUI

Carlota González, Tania Fernández, Eduardo Sousa, Iván Alonso, Manu Garrido, e Roi Rodríguez son os Premios Deporte Tudense 2025 

• Na gala celebrada onte á noite no Teatro Municipal púxose en valor o “invisible” que sostén o deporte tudense destacando a súa importancia e rendendo unha homenaxe 

O alcalde de Tui, Enrique Cabaleiro, e o concelleiro de Deportes, Rafael Estévez, cos premiados a XII Gala do Deporte Tudense

Foto: C.T.

Infogauda / Tui

 Un teatro municipal repleto aplaudiu onte á noite os éxitos do deporte tudense na XII Gala do Deporte Tudense celebrada co lema “O invisible tamén conta”.  

 O Concello de Tui quixo así render homenaxe e pór en valor todo e a todos os que sosteñen o deporte tudense demostrando que “o camiño compartido é a base”. A escenografía, con alpacas, espellos e luces, evocaba o terreo onde nace o deporte, o reflexo de todas as persoas que aportan de seu, e as festas populares nas que deporte está tamén presente.  

 Así  o explicaron o alcalde de Tui, Enrique Cabaleiro, e o concelleiro de Deportes, Rafael Estévez nas súas intervencións.  O rexedor tudense  sinalou o excepcional de que un concello coma Tui, de  17 mil habitantes, teña o nivel deportivo que acada con este ano case 50 internacionais. Indicou que “o deporte é unha gran ensinanza de valores, e dentro deses valores eu creo que o traballar de forma compartida é fundamental, e é fundamental xerar consensos para poder avanzar”. Mentres Rafael Estévez afirmou que “nas cousas pequenas está a forza máis grande” amosando o seu convencemento en que “se non traballamos xuntos, nunca chegaremos lonxe”. Desexou que a gala “sexa unha festa, pero tamén un recordo de que o invisible conta , e conta moito”.  

 Os premios Deporte Tudense na categoría absoluta foron para Carlota González, do Remo do Miño, e Tania Fernández, do Kaiak Tudense. Carlota González é campioa de España en 4-, 8+ e por seleccións autonómicas, e ter participado nos Campionatos de Europa e nos Xogos Mundiais Universitarios.  E Tania Fernández é campioa do Mundo en K2 xunto a Tania García. Premio compartido tamén na categoría masculina, nesta ocasión por catro deportistas, os padexeiros Iván Alonso, Manu Garrido e Roi Rodríguez, e polo futbolista Eduardo Sousa. Iván Alonso do Piragüismo As Torres pecha a temporada coma oitavo do Mundo de Maratón de Piragüismo. Manuel Garrido, do Kaiak Tudense, é subcampión do Mundo en  C2 con Jaime Duro, e Roi Rodríguez, tamén do Kaiak Tudenses, foi campión de España en K1 1000 m e en K2 200 m.  Eduardo Sousa, guardameta e capitán do Pontevedra, recibiu o premio polo ascenso a 1ª RFEF e polos 324 partidos que leva co equipo. Os catro subiron a recoller o galardón acompañados dos seus fillos e fillas visibilizando así á familia.  

 Logo de lograr o ascenso a Preferente a piques de cumprir os 100 anos o Tyde FC recibiu o premio Club ou Entidade Deportiva.  Premio compartido na categoría de adestrador para Manuel López Ramírez que este verán foi preparador físico da Selección de baloncesto de Chipre e para Diego García Fontán preparador físico no Sabah FK da liga de Azerbaixán.   

 Na gala viviuse un momento moi emotivo na entrega do recoñecemento a toda unha carreira que recaeu no padexeiro Iván Alonso que deixa a competición profesional. O público en pé premiou cun longo aplauso os éxitos deportivos de máis de dúas décadas no piragüismo.  

 José Besada Romero, do Club  Kaiak Tudense recibiu o premio en deporte adaptado.  

 Na categoría promesa foron premiados os xogadores Miguel González Moyano, do Club Baloncesto Tui, e Roque Estévez, do Club Balonmán Tui, xunto a  Vera Álvarez e Xiana Fernández, do Club Remo do Miño e Candela Alonso, Xulia Paramos, Zaira Pazos e Sabela Soutelo, do Club Kaiak Tudense. Os Premios Deporte Tudense veterano foron concedidos á Susana Fontán Verde, de tiro olímpico, e á Iván Pereira Iglesias, triatleta.   

 A Quinta de Tui F.S. recibiu o Premio Club na promoción do deporte base.  

 A Eurocidade Tui-Valença viu recoñecido o seu traballo a prol do deporte co galardón Outras Entidades. O Catering Río Tinto recibiu o premio Firma Comercial polo seu apoio ao deporte local.  

 No acto recoñeceuse o papel que no deporte tudense xogaron Alsina Martínez que foi presidenta do Guillarei, e Fernando Fontán que xogou ao fútbol en numerosos equipos. Tamén recoñecemento especial para Eduardo Méndez Sanjurjo que  vén de lograr o máximo recoñecemento de kung fu a nivel europeo: o grao de Cinturon Vermello - Negro 9º nivel; e Julio Conde Romero, que recibiu o cinturón Negro-Vermello 8º Nivel.    

 Houbo tamén momento para lembrar ás persoas falecidas ao longo do último ano que deixaron a súa pegada no deporte local: Coral Vázquez Guerra, Xosé Martínez Tato, Santos Pérez Pereira, Manuel Pérez Antón, Manuel Álvarez Rocha, Daniel Estévez Piño, e Raúl Lago Carvalho    

 Ao longo deste ano foron 43 os e as deportistas tudenses que participaron en competicións internacionais levando o nome de Tui máis aló das nosas fronteiras en remo, piragüismo, baloncesto, fútbol, motocross, judo, triatlón, tiro olímpico e patinaxe. Na Gala recibiron tamén o seu recoñecemento.   

 A Gala foi presentada pola xornalista Andrea Carrera e contou coa actuación musical do grupo Mel.