VIGO

Nueva Pescanova despide unha delegada da CIG no comité do Porriño en represalia por non asinar o acordo económico coa empresa 

• A central reclamará no xulgado a nulidade da decisión e convocará protestas

 

A CIG denunciou hoxe publicamente en rolda de prensa o despido dunha delegada do comité de Nueva Pescanova no Centro Industrial do Porriño

Foto: CIG

Infogauda / Vigo 

 A CIG denunciou hoxe publicamente en rolda de prensa o despido dunha delegada do comité de Nueva Pescanova no Centro Industrial do Porriño como represalia por non ter asinado o acordo económico pactado a nivel estatal pola empresa con CCOO e UGT. A central sindical reclamará a nulidade da decisión no xulgado, ao tempo que convocará protestas “para darlle unha resposta acaída a esta agresión”. 

 Nueva Pescanova comunicoulle o pasado 6 de agosto o despido á delegada da CIG tras 37 anos traballando na empresa, e fíxoo en base a un certificado do servizo médico que a declara non apta como consecuencia dunhas limitacións que até o de agora non lle impedían desenvolver o seu labor. 

 Segundo a cronoloxía que figura na propia carta de despido, a afectada sométese a un recoñecemento pola empresa o pasado 19 de xuño. O 15 de xullo o médico da empresa emite unha valoración considerándoa apta con limitacións, “como viña sendo dende hai sete anos”. Pero o 31 de agosto -“tal e como figura na carta de despido aínda que esta claro que existe un erro na data”- emiten un certificado declarándoa non apta.  

 “O que sucedeu entre o primeiro certificado e o segundo foi que a CIG se negou a asinar o acordo económico pactado cos seus socios a nivel estatal, CCOO e UGT, sindicatos que se prestan a este tipo de componendas coa empresa”, tal e como sinalou o secretario comarcal da FGAMT-CIG de Vigo, Suso García. 

 Pescanova vén aplicando este método de despido dende hai tempo para desfacerse de persoal con antigüidades elevadas na empresa, como aconteceu recentemente no centro de traballo de Chapela. Curiosamente, nestes casos a compañía sempre chega a un acordo coas persoas afectadas que evitan ter que ir a xuízo. Deste xeito despide persoal con antigüidade pagándolle menos indemnizacións. 

 “Neste caso mata dous paxaros dun tiro, xa que por un lado despide a compañeira para castigar a CIG e por outro líbrase dela pagándolle unicamente 20 días por ano traballado cun máximo de 12 mensualidades. Mentres que se o despido fose improcedente -como nós consideramos- serían 33 días por ano”. Con todo, a central sindical vai reclamar a nulidade da rescisión do contrato no xulgado por tratarse dunha delegada sindical e porque a súa situación física non mudou até o punto de xustificar a decisión de declarala non apta. 

 Ademais, censurou que a empresa tivese aproveitado que a maioría do persoal se atopa de vacacións para executar o despido, impedindo unha resposta inmediata dos seus compañeiros/as. “Pero que a dirección Pescanova estea tranquila, que en canto se normalice a situación laboral e o persoal volva ao traballo van ter unha resposta acaída a esta agresión”, ironizou. Neste senso, adiantou que mentres non se celebre o xuízo -para o que aínda non hai data- “imos responder na rúa como sempre facemos”.  

 Ao mesmo tempo, criticou que a empresa non permitise a presenza da delegada despedida na xuntanza do comité do pasado luns 18 de agosto, “algo que consideramos ilegal xa que o despido non é efectivo até que haxa unha sentenza firme e ela podería ser candidata de novo ás eleccións sindicais, polo que segue a ser representante do comité”.  

 Outra cousa é que a despedida se presentase non seu posto de traballo, que non foi o caso, xa que unicamente acudiu ás instalacións da empresa para participar na xuntanza. “Está claro que mediante estes subterfuxios Pescanova pretende cambiar a correlación de forzas no comité, que na actualidade está integrado por 4 representantes da CIG, 3 de USO 3 e 2 de UGT”. 

 Pola súa banda, Jose Piñeiro, delegado da CIG no Porriño, explicou que na xuntanza do comité para tratar o despido da compañeira a central sindical propuxo paralizar as negociacións do convenio até que a compañeira fose readmitida ou houbese unha sentenza firme, “pero consideraron que iso non se ía producir de ningunha das maneiras”.  

 Dende a CIG tamén se puxo enriba da mesa a posibilidade de desenvolver concentracións diante da compañía para rexeitar o despido. “A representación da UGT dixeron que non ía participar, e a da USO comentou que tiña que falar coa dirección do sindicato”. E por último, dende a central solicitáronlle ás dúas organizacións abordar o despido de xeito conxunto comparecendo na rolda de prensa como comité como se fai en todos os casos de despido, “mais dixeron que era un tema individual e que tiña que defendelo ela”.