O ROSAL E TOMIÑO

O obradoiro de emprego ‘O noso patrimonio’ recupera catro espazos etnográficos do Rosal e Tomiño  

• As alcaldesas Ánxela Fernández Callís e Sandra González visitaron os traballos realizados ao abeiro desta formación remunerada en albanelería e carpintaría  

 

As alcaldesas de O Rosal e de Tomiño cunha representación das persoas participantes no Obradoiro de Emprego Roteiros etnográficos O Rosal – Tomiño, ‘O noso patrimonio’

Foto: C.O.R.

Infogauda / O Rosal e Tomiño

 A memoria patrimonial da comarca recobra forza grazas ao traballo da vintena de participantes no Obradoiro de Emprego Roteiros etnográficos O Rosal – Tomiño, ‘O noso patrimonio’. Os concellos do Rosal e Tomiño impulsaron esta formación remunerada en oficios con grande saída laboral como son a albanelería e carpintería en colaboración co Xunta de Galicia e o Servizo Público de Emprego Estatal co obxectivo de dar unha nova oportunidade a persoas desempregadas ao tempo que se apostaba pola recuperación patrimonial dos municipios.  

 A alcaldesa do Rosal, Ánxela Fernández Callís, e a de Tomiño, Sandra González, visitaron estes dúas algunhas das actuacións realizadas, poñendo en valor a dobre finalidade do programa, “recuperar o noso legado e, ao mesmo tempo, abrir novas portas laborais para a veciñanza”. Durante a formación, o alumnado levou a cabo varias labores de restauración en albanelería e carpintaría no camiño e muíños do Folón, no muíño de Pedro, no lavadoiro do Regatiño e a súa contorna e no lavadoiro do Marco.  

 “Este proxecto é unha mostra clara de como a formación pode ser motor de cambio real, tanto na vida das persoas participantes como no propio territorio, que gaña espazos rehabilitados e postos en valor”, destacou Ánxela Fernández Callís. 

 Pola súa banda, Sandra González subliñou que “a cooperación entre concellos permítenos poñer en marcha programas que dan resultados visibles: patrimonio recuperado, economía local dinamizada e xente capacitada para incorporarse a un mercado laboral con alta demanda en carpintaría e albanelería”. 

 Ao longo dos últimos nove meses, o alumnado recibiu máis de 1.200 horas de formación teórica e práctica no centro da Mata, uns coñecementos adquiridos en albanelería ou carpintaría que aplicaron nos rosaleiros muíños do Folón, onde levaron a cabo unha intervención no camiño, realizaron traballos de reparación das partes das canles danadas, repararon sendeiros, empedraron zonas erosionadas, repararon muros de contención danados, executáronse sistemas de drenaxe, substituíronse tellas rotas nos propios muíños, incorporaron nova sinalética en diferentes puntos do camiño, montaron dúas pontes novas e recuperaron unha das xa existentes, entre outras accións. 

 En Tomiño, o alumnado acometeu a recuperación do muíño de Pedro, no que se demoleu a cuberta, se repararon os muros de cachotería, se completaron aqueles nos que se producira algunha perda de material e cubriuse de madeira cun sistemas de placas de fibrocemento completada cunha capa a base de tella cerámica curva. Ademais, limpouse a zona da fonte e do manancial, colocáronse chanzos de baixada e tubaxes de saída da auga, executouse unha nova cuberta cunha estrutura a base de pezas de madeira e instalouse unha nova porta elaborada en madeira maciza. 

 A través do obradoiro de emprego tamén se levou a cabo a limpeza do lavadoiro tomiñés do Regatiño; canalizouse a auga; colocouse unha cuberta de fibrocemento, tela illante e tellas; e fabricouse unha nova cuberta cunha estrutura a base de cerchas de madeira sobre as que se asentaron un conxunto de correas.  

 Por último, no lavadoiro do Marco, tamén en Tomiño, demoleuse a cuberta antiga e colocouse unha nova con pezas de fibrocemento, illante e tellas, limpáronse e restauráronse pezas de pedra existentes, reparáronse os muros de cachotería e creouse e instalouse unha nova cuberta de madeira. 

 As rexedoras destacaron a importancia de levar a cabo iniciativas como o Obradoiro de Emprego Roteiros etnográficos O Rosal – Tomiño, ‘O noso patrimonio’, que “permite achegar ao alumnado a oficios de sectores estratéxicos cunha alta demanda laboral na contorna, o que nos permitirá ademais fomentar a economía local nos nosos concellos”. Ademais, durante o encontro co alumnado puxeron en valor a importancia da colaboración entre os dous concellos para poñer en marcha proxectos “que xa sabemos que dan os seus froitos e que están avalados por experiencias anteriores como o Agroemprega, que rematou cunha alta taxa de inserción laboral do máis dun cento de persoas participantes”.