A GUARDA

Rafa Durán será o pregoeiro da XXXIII Festa da Lagosta e da Cociña Mariñeira da Guarda 

• A festa gastronómica por excelencia da Guarda, comezará este ano ás 12:00h do primeiro venres de xullo  

Rafa Durán, presentador, cómico e actor, encargarase do pregón da Festa da Lagosta e da Cociña Mariñeira

Foto: Cedida

Infogauda / A Guarda  

 A XXXIII Festa da Lagosta e da Cociña Mariñeira da Guarda comezará o venres 4 de xullo ás 12:00h, coa apertura da carpa, mais non será ata ás 20:30h cando escoitemos o pregón. Será no porto da Guarda e contará cun pregoeiro de luxo, Rafa Durán. 

 O presentador, cómico e actor de Baiona, encargarase do pregón da Festa da Lagosta e da Cociña Mariñeira. 

 Rafa Durán é coñecido polas súas múltiples facetas relacionadas co humor e a televisión, como presentador de programas e concursos da TVG como “Hit list”, “Aquí Galicia” ou “Imos de feria”.   

 No eido humorístico, Rafa Durán é membro do dúo cómico de improvisación teatral “Coaches de Choque” xunto Oswaldo Digón. Ademais, é moi coñecido en redes sociais como Instagram e Tiktok polos seus sketchs de humor: as #Duranadas.  

 “Invito a todos e a todas a vir ao pregón desta Festa da Lagosta, xa que contamos cun pregoeiro espectacular que desde logo, será o arranque para outra Festa da Langosta de récord”, dí o alcalde, Roberto José Álvarez Carrero.  

 Despois do pregón, os asistentes poderán continuar a degustar os pratos que se ofertan dentro da carpa, cuxa capacidade aumenta este ano ata os 600 comensais grazas aos seus 1.200 metros cadrados. 

 Ademais de lagosta e pratos mariñeiros, a rosca de xema, a sobremesa típica guardesa desde hai máis de 70 anos, será protagonista.