FORMACIÓN

A Federación pola Igualdade das Mulleres da Provincia de Pontevedra (FEMUPO) lanza unha nova edición do Proxecto ÁS 

•  Para formar a mulleres no manexo profesional de drons 

Raquel Touriño / Pontevedra

A Federación pola Igualdade das Mulleres da Provincia de Pontevedra (FEMUPO) pon en marcha unha nova edición do Proxecto ÁS, unha iniciativa pioneira que busca formar a mulleres en sectores tradicionalmente masculinizados. Tras o éxito da convocatoria do ano pasado, o proxecto amplíase neste 2025 cunha nova oferta formativa nas localidades de Pontevedra e Tui. 

 O obxectivo principal do Proxecto ÁS é proporcionar ás mulleres da provincia ferramentas para mellorar a súa empregabilidade e fomentar o emprendemento no ámbito tecnolóxico, concretamente no sector dos drons, cun gran potencial de futuro. 

Grupo de mozas que participaron nunha edición formativa precedente con cadanseu dron de agasallo por haber completado á formación

 Formación técnica con dron de agasallo; As accións formativas, totalmente gratuítas, terán unha duración total de 24 horas (16 horas de contidos teóricos, 4 de prácticas e 4 de exame), e estarán impartidas por persoal especializado. Un dos grandes atractivos do programa é que cada participante recibirá un dron ó completar a formación, co obxectivo de facilitar o acceso real ao mercado laboral ou ao desenvolvemento de proxectos propios. 

 “Queremos romper estereotipos e abrir camiños. As mulleres teñen moito que aportar ao sector tecnolóxico e con este proxecto pretendemos achegarlles ferramentas reais para conseguilo”, sinalan desde FEMUPO. 

Inscrición aberta ata completar prazas 

 A inscrición xa está dispoñible a través do seguinte formulario en liña: https://docs.google.com/forms/d/e/1FAIpQLSdgkIZ8HOAkPaxVoJ0QaJnEvw_VT9FYap- JOD0Ls9wJqZSJCA/viewform 

 As prazas son limitadas e a formación está dirixida exclusivamente a mulleres empadroadas na provincia de Pontevedra.

Máis información e contacto: 

Correo electrónico: secretariafemupo@gmail.com 

Teléfono / WhatsApp: 623 955 612 

 O Proxecto ÁS conta co apoio da Deputación de Pontevedra, e enmárcase nas accións estratéxicas de FEMUPO para impulsar a igualdade de oportunidades e o acceso das mulleres aos sectores tecnolóxicos emerxentes.