FORMACIÓN

A Xunta de Galicia inviste máis de 50.000 euros en cursos de formación para traballadores do Baixo Miño 

• O delegado territorial visitou as empresas Ronáutica Qualty Marinas S.L. e Sinerxia, en Tui, onde se levaron a cabo cursos de Competencias dixitais e Saúde intelixente

O delegado territorial da Xunta de Galicia en Pontevedra, Agustín Reguera, visitou esta mañá as empresas Ronáutica Qualty Marinas S.L. e Sinerxia, ambas no concello de Tui

Foto: X.G.

Infogauda / Tui

 O delegado territorial da Xunta de Galicia en Pontevedra, Agustín Reguera, visitou esta mañá as empresas Ronáutica Qualty Marinas S.L. e Sinerxia, ambas no concello de Tui, con motivo dos Bonos Talento Empresa cos que a Xunta está a financiar a formación e especialización de centenas de traballadores en toda a provincia.   

 Neste sentido, Ronáutica Qualty Marinas S.L. recibiu unha achega de máis de 12.600 euros para a realización dun curso de competencias dixitais de 40 horas de duración no que participaron 13 empregados. Pola súa banda, a empresa Sinerxia recibiu preto de 10.500 euros para levar a cabo dous cursos de Saúde Intelixente de 96 e 48 horas nos que participaron un total de seis traballadores.  

 Cabe destacar que na provincia de Pontevedra beneficiáronse destes Bonos Talento Empresa un total de 56 empresas de 14 concellos distintos, por un importe total de máis de 640.000 euros.   

 Na comarca do Baixo Miño tamén recibiron esta axuda as empresas Cal Baixo Miño Construcciones y Servícios (21.800€), con base no concello de Tomiño, e Lidia Mariño Melo (5.800€), con sede en Tui.   

 O delegado territorial aproveitou a visita para lembrar o compromiso da Xunta co sector empresarial e a importancia de “axudas como esta que permiten manter a excelencia das nosas empresas e traballadores”. Neste sentido, Reguera sinalou que a formación dos profesionais “é un investimento que xera un retorno moi significativo ao medio prazo”.