DEPORTES

FÚTBOL

Segunda Futgal

U. D. RIBERA E S. D. SALVATERRA

• Este sábado, día 1 de marzo, ás 17:00 horas, no campo municipal da Mata (O Rosal)

Ricardo Rodríguez Vicente / O Rosal

 O equipo da U.D. Ribera recibirá este sábado día 1 de marzo, ás 17:00 horas, no campo municipal da Mata, ao conxunto da S.D. Salvaterra. 

 Ese encontro, que corresponde á xornada 17ª, que fora aprazado por causa do temporal do pasado 12 de febreiro; é moi importante para o conxunto de O Rosal, a fin de manter vivo o obxectivo do ascenso directo.

 Nestes momentos a U.D. Ribera atópase no 4º posto da táboa clasificatoria, con 34 puntos, logrados mediante 10 vitorias e 4 empates, habendo coñecido a derrota en 6 encontros.

 O conxunto do Rosal ten por diante a UVCD Candeán, Mondariz C.F., e Caselas C.F., con 43, 39 e 37 puntos, respectivamente, coa particularidade de que o Mondariz C.F. ten disputados 21 encontros, fronte aos 20 da UVCD Candeán, Caselas C.F. e U.D. Ribera.

 Pola súa banda, o equipo da S.D. Salvaterra, está no posto 11º, con 24 puntos, froito de 6 vitorias e 6 empates, resultando derrotado en 8 partidos.

 En definitiva, o equipo da U.D. Ribera - que vén realizando unha magnífica temporada 2024/25 - proponse ofrecerlle aos seus seareiros unha boa tarde de fútbol. E o equipo visitante procurará levarse algún positivo para súa conta particular. 

 Así pois, os afeccionados do Rosal teñen unha cita este sábado no campo da Mata para animar aos xogadores na procura dunha vitoria que os manteña nos postos altos da táboa.