A CIG-Saúde reclama o uso sanitario do edificio da cafetaría do antigo Hospital Xeral de Vigo
• Lembra que nestes momentos a área sanitaria ten condicionado a labor asistencial pola escaseza de espazos físicos dentro dos inmobles do Sergas
Infogauda / Vigo
A CIG-Saúde reclama o uso sanitario do edificio da cafetaría do antigo Hospital Xeral, inmoble que segue a estar no ámbito de uso da Consellaría de Sanidade e que ten sido obxecto de distintas propostas de habilitación para distintos usos de carácter asistencial.
Dende a central sindical lembran que nestes momentos a área sanitaria ten condicionado a labor asistencial pola escaseza de espazos físicos dentro dos inmobles da propiedade do Sergas. En concreto, a CIG-Saúde ten proposto alternativas como acoller fisioterapia de Atención Primaria, que conta con listas de espera que superan, de xeito habitual, o ano.
As propias persoas traballadoras do servizo público de saúde teñen solicitado mudar a instalación do servizo de radioloxía de Taboada Leal para este espazo, “dado que o lugar que ocupa actualmente ten grandes carencias”.
Por iso a central sindical, ante a posibilidade de que se establezan outros usos non sanitarios, urxe a Consellería a habilitar ese espazo “para un uso sanitario que dea resposta ás necesidades asistencias da nosa área sanitaria”.
Ningún comentario:
Publicar un comentario