PONTEVEDRA

A Deputación de Pontevedra abre este luns o prazo para solicitar as visitas a granxas escola do programa Vive o Rural 

• O programa dobra o seu orzamento respondendo á grande acollida da primeira edición, que esgotou a totalidade do seu crédito en cuestión de horas 

Nas saídas de Vive o Rural realizaranse actividades de toma de contacto cos animais, labores da horta, obradoiros educativos ou xogos, todas elas coa finalidade de que a rapazada se achegue á realidade das actividades agrícolas e gandeiras

Foto: D.PO.

Infogauda / Pontevedra

 A Deputación de Pontevedra abre este luns 13 de xaneiro o prazo para solicitar as visitas ás granxas escola da provincia no marco do programa Vive o Rural. Esta nova edición da iniciativa, na que poderá participar o alumnado dos centros escolares públicos dos concellos de menos de 20.000 habitantes, contará este ano con 60.000 euros. Trátase do dobre de orzamento respecto á primeira edición do programa, en resposta á súa grande acollida: a Deputación esgotou todo o crédito dispoñible en cuestión de horas.  

 Poderán ser beneficiarios de Vive o Rural tanto os propios centros (de educación infantil, primaria e secundaria) como as ANPA legalmente constituídas, que recibirán ou máximo de 1.250 euros (25 € por alumno ata un máximo de 50) co obxecto de financiar o custo das entradas ás instalacións (que poden incluír a comida) e os gastos de desprazamento en transporte colectivo. As solicitudes poderanse realizar ata o 7 de febreiro de 2025, e as saídas realizaranse en calquera das cinco granxas escola situadas na provincia: Serantellos (en Cambados), Fervenzaventura (en Silleda), Kiriko (en Fornelos de Montes), Corazón de Carballo (en Tomiño) ou Río Mouro (en Poio).  

 Nas saídas de Vive o Rural realizaranse actividades de toma de contacto cos animais, labores da horta, obradoiros educativos ou xogos, todas elas coa finalidade de que a rapazada se achegue á realidade das actividades agrícolas e gandeiras e adquira coñecementos prácticos sobre a produción local, as características dos cultivos, a vida dos animais, o coidado do medio natural e a valorización do sector primario. Ademais, a posta en valor do mantemento da biodiversidade, da paisaxe e da tradición agraria como elemento de identidade da cultura da provincia. O ano pasado recibíronse solicitudes de 44 centros e ANPA de 21 concellos da provincia, coa participación de 1.500 nenos e nenos de 25 centros de ensino.