TUI

Tui despedirá 2024 con deporte, música e solidariedade 

•  Case 1.900 persoas participarán na III San Silvestre Solidaria. A Orquestra Kubo actuará no recinto feiral a partir da 01:00 h da madrugada  

Tui prepárase para despedir o ano de forma festiva con deporte, música e solidariedade

Foto: C.T.

Infogauda / Tui

 Tui prepárase para despedir o ano de forma festiva con deporte, música e solidariedade. Este 31 de decembro de 2024 baterá récord de participación na San Silvestre que en só tres edicións consolídase cunha cunha gran acollida coma demostran as 1.879 persoas inscritas. Con esta proba as rúas da cidade serán unha festa para despedir o ano.   

 Dende ás 9 h as case 1.900 persoas inscritas poderán retirar o seu dorsal no novo espazo sociocultural da rúa Camilo José Cela. A San Silvestre comezará ás 10.30 h dende o paseo da Corredoira para realizar un percorrido de catro quilómetros polo centro urbano andando, correndo ou practicando marcha nórdica. Á chegada á meta, as persoas participantes poderán disfrutar dun chocolate quente con rosca. Ao son das badaladas do reloxo da praza da Inmaculada, ás 12 h, tomaranse as uvas celebrando así con doce horas de antelación o novo ano.  Para amenizar a festa contarase coa participación de Dj Donper que porá o ritmo festivo ao evento.  Cómpre lembrar que a San Silvestre é solidaria coa Asociación Española contra o Cancro, polo que haberá un posto desta asociación no que se poderán realizar doazóns. A III San Silvestre está organizada conxuntamente polo Club Atletismo Tui e o Concello de Tui.  

 Por outra parte este martes, de 12 a 14 h, abrirán as vinte casetas do Mercado de Nadal no Paseo da Corredoira, mentres que de 11 a 14 h pequenos e maiores poderán gozar unha nova xornada co taller máxico de Papa Noel.   

 A festa continuará á 01:00 da madrugada, xa que a orquestra Kubo actuará no recinto feiral na Avenida da Concordia. Nun escenario grande, cunhas dimensións de 30 x 11 metros, brindarán un espectáculo durante tres horas, con 16 persoas en escena, no que realizarán unha viaxe musical dende os anos 70’ até a actualidade, para dar a benvida ao 2025.