A GUARDA

LUIS ALBERTO FRANCO LOMBA VAI PRESENTAR UNHA EXPOSICIÓN DE DEBUXOS A PLUMILLA E PINCEL

•  En solidariedade coa asociación oncolóxica infantil Bicos de papel

• Do 19 de decembro de 2025 ao 15 de xaneiro de 2026, na Casa dos Alonso

Luis Alberto Franco Lomba nunha exposición precedente na Casa dos Alonso

Foto: Infogauda

Ricardo Rodríguez Vicente / A Guarda

 Luis Alberto Franco Lomba ten todo a punto para unha nova exposición de debuxos a plumilla e pincel, da súa autoría. Será dende o día 19 de decembro de 2025 ata o día 15 de xaneiro de 2026, na Casa dos Alonso. 

 

 A inauguración da exposición - en solidariedade coa asociación oncolóxica infantil Bicos de papel - vai ser ás 19:00 horas, do venres, 19 deste mes de decembro.

 Dese xeito, todas ás obras que vai presentar Luis Alberto Franco nesta exposición estarán á venda a beneficio de Bicos de papel. 

 Luis Alberto Franco Lomba é, sen dúbida, un creador que ten na arquitectura urbana e monumental de varias localidades - como A Guarda, Madrid, Oia, O Rosal, Vigo,..., entre outras -, súa fonte de inspiración. É un debuxante con ampla formación técnica e experiencia profesional. Rigoroso no seu labor creativo e hábil na execución artística.

 Esta exposición vai ser unha oportunidade magnífica para adquirir obras de Luis Alberto Franco e colaborar a unha boa causa.

Asociación Bicos de papel

 Bicos de papel nace dun grupo de familias que pasaran ou estaban a pasar pola experiencia de ter un fillo con cancro, e que coñecían de primeira man os problemas aos que se enfrontaban tras o diagnóstico. Isto impúlsalles a crear Bicos de Papel e así promover melloras na atención e apoiar a outras familias. Bicos de papel asociación de axuda ós nenos oncolóxicos de Hospital Álvaro Cunqueiro queda constituída como asociación sen ánimo de lucro o día 28 de xuño de 2017, e inscríbese no rexistro de asociacións da Comunidade autónoma de Galicia. En 2019 a asociación foi incluída no Rexistro Único de Entidades Prestadoras de Servizos Sociais (RUEPSS) e no Rexistro de Acción Voluntaria de Galicia. No 2022 conseguimos a declaración de entidade de utilidade pública.

 Bicos de Papel desenvolve o seu traballo coas familias cuxos fillos foron ou están a ser tratados na Unidade de Oncoloxía Pediátrica do Hospital Álvaro Cunqueiro de Vigo, unidade que atende a menores de todo a área sanitaria de Vigo e a pacientes pediátricos oncolóxicos da área de Ourense. A asociación conta co apoio do equipo de Oncoloxía que se encarga de informar as familias dos pacientes da existencia de Bicos de papel e posibilitan que se poñan en contacto con esta asociación.