TUI

As sesións formativas Alzheimer de preto chega esta semana a Tui 

•  Serán este mércores e xoves ás 16.30 h na Sala Félix Rodríguez 

Infogauda / Tui

 A Sala Félix Rodríguez, no edificio Francisco Sánchez, vai acoller este mércores 4 e o xoves 5, de decembro, de 16.30 a 18.30 h, unhas sesións formativas sobre Alzheimer e outras demencias. Esta actividade está organizada por FADEAL (Federación Atlántica de Asociacións de Familiares de Persoas con Alzheimer e outras Demencias), co financiamento da Deputación de Pontevedra e en colaboración do Concello de Tui,  

 A sesión formativa será impartida por AFAGA Alzheimer  e vai dirixida principalmente a coidadores/as de persoas cunha demencia neurodexenerativa, pero tamén a persoas diagnosticadas en fase moi temperá, así como a calquera persoa interesada na temática.  

 As demencias teñen unha alta prevalencia (estímase que afectan ao 31,25% das persoas que superan os 85 anos), especialmente en Galicia, cunha poboación altamente envellecida. Ademais, o contexto rural experimenta un fenómeno de sobre envellecemento ao que se lle engade unha escaseza de servizos e ausencia de intervencións. Esta realidade non só afecta á persoa que padece a enfermidade, senón tamén a todo o núcleo familiar.  

 Por este motivo ponse a disposición das persoas afectadas esta formación gratuíta, que será impartida por unha psicóloga e unha traballadora social especializadas na temática. O obxectivo é formar, orientar e axudar a persoas que se atopen nesta situación, achegando coñecementos e recursos para poder afrontar mellor a enfermidade e mellorar  a calidade de vida da persoa con demencia e da súa familia.