A GUARDA

Recanto da arte

GENARO ALONSO MARTÍNEZ EXPÓN ESCULTURAS

•  Na Escola. Centro Sociocomunitario e Cultural, xestinado por San Xerome

Unha das obras da autoría de Genaro Alonso Martínez

Fotos: Infogauda

Ricardo Rodríguez Vicente / A Guarda

 Como unha acertada metáfora da sociedade do lixo de entre séculos, na que o capitalismo voraz inoculou nas mentes da maioría dos consumidores do mundo occidental aquela máxima de “usar e tirar”; o artista Genaro Alonso Martínez, bríndanos unha mostra do seu labor escultórico, en pequeno e mediano formato. Faino na Escola. Centro Sociocomunitario e Cultural - cuxo lema é: onde vivir as artes dende a diversidade - xestionado por San Xerome, ubicado no nº 65, da rúa Concepción Arenal, na vila de A Guarda.

 Nese lugar, atendido por parte dun dilixente grupo humano do Servizo de Persoas Adultas da Asociación San Xerome Emiliani;  Genaro Alonso presenta  unha heteroxénea selección do seu labor artístico. E faino dándolles unha nova vida a unha morea de obxectos metálicos que habendo cumplido súa función inicial para os cales foron fabricados, teñen agora, grazas as mans de Genaro, unha nova razón para  “renacer”. Neste caso, no mundo artístico.

Vista parcial da exposición de Genaro Alonso Martínez

 

 Desde criaturas que nos evocan o período xurásico, ata figuras antropomorfas, pasando por vehículos de diversa tipoloxía (de dúas rodas, de tres, de catro, de eirugas,...), animais, elementos vexetais, aves,...

 Todo canto fai este artesán ten súa razón de ser. Hai un intelixente percorrido previo que nos conduce a un grato resultado final, onde queda de manifesto que logo do proceso neuronal e de visibilización mental da obra antes da súa existencia como tal, houbo un meticuloso traballo de execución. O resultado é puro arte.

 O escultor e pintor Pablo Emilio Gargallo Catalán (Maella, 5 de xaneiro de 1881-Reus, 28 de decembro de 1934) estaría moi ledo de ter a Genaro Alonso como discípulo. Temos esa convicción.  

Exposición 

Genaro Alonso Martínez

Lugar

Escola. Centro Sociocomunitario e Cultural

Rúa Concepción Arenal, nº 65 - baixo (A Guarda)

Horarios

Mañás (de luns a venres): de 10:30 a 12:30 horas.

Tardes (xoves e venres): de 18:00 a 20:00 horas.