TUI

Abel Losada destaca a transformación que está a vivir Tui da man dos investimentos do Goberno de España 

• O CCPA entrará en funcionamento nos próximos meses 

• Visita co alcalde, Enrique Cabaleiro,e mandos policiais as obras  do Centro de Cooperación Policial e Aduaneira de Galicia, que entran na recta final 

O subdelegado do Goberno en Pontevedra, Abel Losada, nun momento da visita co alcalde de Tui, Enrique Cabaleiro, e mandos policiais, as obras  do Centro de Cooperación Policial e Aduaneira de Galicia, que entran na recta final 

Foto: S. do G.

Infogauda / Tui 

 O subdelegado do Goberno en Pontevedra, Abel Losada, visitou esta mañá o novo Centro de Cooperación Policial e Aduaneira de Tui. O subdelegado destacou que estas obras, que ascenden a 3.313.766,84€ e están financiadas polo Ministerio de Interior, evidencian a aposta decidida do Goberno de España por mellorar as infraestruturas e servizos desta vila fronteiriza. Fíxoo ao pé do novo Centro de Cooperación Policial e Aduaneira de Galicia (CCPA), un centro único polas súas características e que vén substituír á antiga Comisaría Hispano Lusa. Un inmoble, subliñou Losada, que “é tamén unha referencia a nivel europeo de traballo conxunto das Forzas e Corpos de Seguridade de dous países no corazón dunha das eurorrexións máis activas e fluídas de Europa”. 

 Na visita, Abel Losada estivo acompañado do alcalde de Tui, Enrique Cabaleiro; do comisario xefe provincial, Juan José Díaz; e do tenente da Garda Civil, Víctor Ahedo. Na xuntanza deu conta que o Goberno vén de adxudicar o subministro do mobiliario deste edificio, último paso que estaba pendente e que permitirá que o CCPA comece a funcionar ao longo dos próximos meses. A posta en marcha deste Centro “suporá un cambio cualitativo no traballo policial neste punto neurálxico da raia”, explicou.  

 No CCPA traballarán 14 funcionarios da Policía Nacional ao mando dun inspector, xunto con dous oficiais e axentes. Por parte da Garda Civil serán un total de 11 efectivos. Nesta base estará presente tamén o Servizo de Vixilancia Aduaneira español e, pola parte portuguesa, a GNR (Guarda Nacional Republicana), a Policía Judiciaria, a Policía de Segurança Pública, a Autoridade Tributaria e a Policía Marítima. 

O CCPA máis moderno de España 

O Centro de Cooperación Policial e Aduaneira de Tui é un dos nove centro destas características que existen en España. Cando entre en funcionamento será o máis moderno de todos os existentes, cunha superficie construída de 1.193,76 metros cuadrados.  

 O novo edificio conta con dous corpos edificatorios conectados, un destinado ao labor administrativo e un outro a aparcamento cuberto. O edificio principal alberga despachos, salas de reunións, vestiarios, aseos, salas de descanso e armeiros. O acceso principal ao edificio realizarase pola Avenida de Portugal, mentres que o acceso de vehículos realizarase pola travesía. 

Máis de 17 millóns de euros para transformar a cidade 

 O subdelegado repasou tamén algunha das principais inversións que o Goberno de España está a realizar en Tui, “e que están contribuíndo decisivamente na súa transformación”. Neste sentido, destacou os investimentos no marco do Programa de Impulso á Rehabilitación dos Edificios Públicos (PIREP), que van permitir mellorar a eficiencia enerxética do edificio multiusos da rúa Camilo José Cela e que posibilitarán tamén a recuperación do Teatro Principal, unha vella demanda que por fin terá resposta grazas á chegada dos fondos do Plan de Recuperación do Goberno. O subdelegado destacou tamén que os fondos europeos son os que están a permitir modernizar o mercado municipal e a súa contorna.  

 En materia de conservación do patrimonio, neste caso o natural, o subdelegado tamén puxo en valor as actuacións da Confederación Hidrográfica Miño-Sil para construír unha pasarela peonil na desembocadura do río Rubio e mellorar a contorna do río Caselas. 

 No capítulo de infraestruturas, Abel Losada recordou que o Concello de Tui beneficiouse nos últimos anos de varias actuacións do Ministerio de Transportes por un importe superior aos 11 millóns de euros para, entre outros, renovar as infraestruturas e vías do tramo ferroviario Estación de Guillarei-Fronteira Portuguesa, adaptar os usos museísticos do conxunto catedralicio (1,5% cultural), rehabilitar o Centro Especializado en Tecnificación Deportiva (CETD) e adecuar e mellorar un tramo do Camiño de Santiago Portugués na N-550. 

 Todos estes investimentos, que se completan con outras inversións destinadas a elaborar a Axenda Urbana, desenvolver os Plans de Sustentabilidade Turística en Destino (PTSD), crear unha oficina Acelera PEME ou continuar coa Aula Mentor, “poñen de manifesto o compromiso do Goberno de España e do seu presidente, Pedro Sánchez, con Tui e con todos e cada un dos concellos da provincia”, concluíu o subdelegado.