TOMIÑO

Tomiño celebra unha nova xornada de adopción de cans e gatos  

• Organizado polo grupo de voluntariado da OMIX, ‘Peludos en apuros’ estará este sábado 27 de abril na Praza do Seixo  

Infogauda / Tomiño  

 Co obxectivo de concienciar sobre a tenencia responsable de mascotas e fomentar a adopción de animais de compañía, o Concello de Tomiño celebra este sábado 27 de abril unha nova edición de ‘Peludos en apuros’, unha xornada de sensibilización e adopción de cans e gatos aberta a todos os públicos. 

 Organizada polo grupo de voluntariado da Oficina Municipal de Información Xuvenil (OMIX) de Tomiño, ‘Peludos en apuros’ estará de 10.00 a 14.00 horas na Praza do Seixo para promover a adopción fronte á compra de animais de compañía nun encontro para posibles persoas ou familias adoptantes no que se informará a todas e todos os visitantes sobre o problema do abandono e se asesorará sobre os pasos a seguir para adoptar unha mascota. 

 Durante a xornada, buscarase tamén concienciar a todo o público da importancia de facerse responsable dos animais de compañía e non abandonalos ao longo do ano, tentando combater as estatísticas, segundo as que cada tres minutos unha mascota é abandonada en España, unha das cifras máis altas de abandono animal de Europa. 

 Dende o Concello e o grupo de voluntariado da OMIX de Tomiño agradécese a colaboración cidadá, non só participando na xornada senón tamén a través da doazón de alimentos e materiais como xoguetes, mantas, area,..., que serán entregados ás protectoras colaboradoras.