GALIZA

A sanidade galega mobilizarase en apoio e solidariedade coa sanidade en Palestina 

• A CIG-Saúde convoca concentracións este mércores 24 de abril en todas as áreas sanitarias 

Infogauda / Galiza

 A CIG-Saúde mobilizarase este mércores 24 de abril en apoio e solidariedade co persoal sanitario e de axuda humanitaria de Palestina. As concentracións terán lugar ás 12:00 horas diante da entrada principal dos sete hospitais de referencia das distintas áreas sanitarias. 

MOBILIZACIÓNS 

• Ferrol - Hospital Universitario Arquitecto Marcide. 

• A Coruña - Hospital Universitario de A Coruña. 

• Santiago de Compostela - Hospital Clínico. 

• Lugo - Hospital Lucus Augusti. 

• Ourense - Hospital Universitario de Ourense. 

• Pontevedra - Hospital Universitario Montecelo. 

• Vigo - Hospital Uniersitario Álvaro Cunqueiro.

 O acto, convocado pola CIG-Saúde en repulsa aos ataques a hospitais, centros de saúde, ambulancias, escolas médicas, persoal sanitario e de axuda humanitaria, conta co apoio da Asociación Galaico Árabe Jenin, Mar de Lumes e Galiza por Palestina. 

 A CIG-Saúde fai un chamamento ao persoal da sanidade a sumarse a estas mobilización porque “non podemos ficar caladas diante do xenocidio e barbarie que outros están a consentir”.  

MANIFESTO 

OS HOSPITAIS DE GAZA NON SON UNHA AMEAZA! 

 A sanidade galega en apoio á sanidade da Palestina. 

 Os hospitais, centros de saúde e ambulancias non poden ser obxectivos militares. 

 As traballadoras e traballadores da sanidade galega queremos dicir que o persoal da sanidade da  Palestina non está só. 

 A CIG-Saúde, co apoio da Asociación Galaico Árabe Jenin, Mar de Lumes e Galiza por Palestina, instamos ao persoal da sanidade e ao conxunto da cidadanía, a concentrarse o mércores 24 de abril ás 12 h, nas portas dos Hospitais das sete cidades de Galiza en repulsa aos ataques a hospitais, centros de saúde, ambulancias, escolas médicas e persoal sanitario e de axuda humanitaria. 

 Bombardear hospitais, centros de saúde e ambulancias é un crime de guerra que converte en vítimas ás persoas que tiñan que coidar e socorrer á poboación de Palestina. 

 O Estado de Israel está utilizando os ataques aos centros sanitarios dentro da estratexia de barbarie e xenocidio contra o podo de Palestina. 

 Condenamos as políticas de apartheid e violencia, tanto física como simbólica, psicolóxica e económica, do estado de Israel contra a poboación árabe da Palestina. Os ataques contra hospitais, centros de saúde e ambulancias son unha mostra desta violencia. 

 Segundo a propia OMS recoñece, o estado de Israel está realizando ataques sistemáticos contra hospitais, clínicas ou ambulancias tanto en Gaza como en Cisxordania. 

 Foron bombardeados hospitais cos corredores abarrotados de feridos, enfermos ou moribundos; coas morgues ateigadas; mentres se realizaban operacións sen anestesia e decenas de miles de gazatís desprazados estaban refuxiados ao seu amparo. 

 Como traballadoras e traballadores da sanidade non podemos quedar caladas fronte a esta barbarie, fronte a este xenocidio, polo que queremos mostrar o noso apoio e solidariedade co persoal da sanidade de Palestina e reclamar a fin da barbarie e do xenocidio que está a cometer o estado de Israel. 

A sanidade galega coa Palestina. 

Alto aos ataques contra hospitais e persoal sanitario! Galiza coa Palestina! 

Palestina vencerá!