O ROSAL

Esta fin de semana volverán escoitarse os ‘Ecos do Nadal’ no Rosal  

• A Coral ‘Ecos do Folón’ actuará este domingo 10 de decembro, ás 18.00 horas no auditorio municipal acompañada do Coro ‘Cantemos’, de Salvaterra, e da Coral Polifónica ‘Vagalume’, de Oia   

Infogauda / O Rosal

 O Nadal continúa no Rosal con moita música. Este domingo 10 de decembro, ás 18.00 horas, o auditorio municipal será o escenario do XIII Concerto Coral ‘Ecos do Nadal’, unha das actuacións máis agardadas nestas datas festivas por rosaleiros e rosaleiras. Organizado pola Coral Ecos do Folón, de Fornelos, a actuación contará coa colaboración da Asociación Músico-Cultural Ecos do Folón; Concello do Rosal, Comunidade de Montes Veciñais en Man Común de Santa Mariña, e da Deputación de Pontevedra, a través do programa PonteGal.   

 O público poderá gozar de balde dun espectáculo no que a Coral Ecos do Folón estará acompañada polo Coro ‘Cantemos’ de Salvaterra, unha entidade nada hai máis de 20 anos co obxectivo da divulgar a música coral por medio de concertos e intercambios con outras asociacións. Contará tamén coa participación da Coral Polifónica ‘Vagalume’, de Oia, fundada en 2001. 

Coral Ecos do Folón

 A Coral Ecos do Folón naceu como asociación músico-cultural no ano 2012, con 17 compoñentes, e foi crecendo de forma paulatina ata chegar ás máis de 30 voces mixtas coas que conta na actualidade. Participante en todos os circuítos culturais, a coral organiza cada anos dous esperados concertos no Rosal, ‘Ecos de Verán’ e ‘Ecos de Nadal’. Neles amosa no escenario o seu variado repertorio, no que se inclúen temas tradicionais galegos, habaneiras, valses, boleros, cantos relixiosos, panxoliñas,..., moitos deles arranxados, compostos ou adaptados polo director da coral, Jorge Fernández González.